Reseıdiń soltústik-batys federaldy okrýgi quramyna kiretin Karelııa respýblıkasynda ornalasqan «Úsh aıý» haıýanattar baǵynda ańdar bir kún ishinde adamdarǵa eki ret shabýyl jasaǵan. Bul týraly «Lifenews.ru» aqparyna silteme jasaı otyryp, RIA «Novostı» habarlady.
Birinshi shabýyl búgin túnde oryn aldy. Haıýanattar baǵynyń jumysshysy Iýrıı L. qyzyna ańdardy qalaı tamaqtandyratyn kórsetpek bolyp ony tordyń ishine alyp kirgen. Iýrıı tamaq bermek bolyp qolyn soza bergende, Tıshka esimdi alty jasar aıý oǵan atyla ketken. Abyroı bolǵanda, kishkentaı qyz kómek shaqyryp ákesiniń ómirin arashalap qalǵan.
Aıaq pen qoldary jaraqattanǵan Iýrııdi jedel járdem qyzmeti aýrýhanaǵa jetkizdi. Dárigerler operasııa jasap, qazir onyń ómirine eshbir qaýip tónip turǵan joq ekenin aıtady. «Biz júgirip kelip, Iýrany aıýdyń astynan julyp aldyq, – deıdi onyń áriptesteri. – Iýra mas bolǵan, al Tıshka alkogoldiń ıisin jek kóredi. Negizi Tıshka óte tynysh ári meıirimdi aıý, onyń mundaı áreketke barýyna alkogoldiń ıisi sebepshi bolǵan kórinedi».
Ekinshi oqıǵa dál osy jerde búgin kúndiz oryn alyp otyr. Bul joly jyrtqysh ańnyń shabýylyna haıýanattar baǵyna ulymen kelgen 29 jasar Dmıtrıı S. ushyrady. Oǵan Dasha esimdi aıý shabýyl jasaǵan. Kýágerlerdiń aıtýyna qaraǵanda, aıý tordyń artyna qaraı shegine berip alǵa qaraı júgire jóneldi. Aldynda turǵan qorshaýdan sekirip ótken ol Dmıtrııge qaraı umtylǵan. Haıýanattar baǵynyń jumysshylary araǵa ańshylyqqa úıretilgen ıtterdi salyp júrip, áreń degende er azamatty qutqaryp qaldy. «Sodan soń ashynǵan aıýdy mekeme dırektory óz qolymen atyp óltirdi», – deıdi kýágerler.
Dmıtrıı tez arada aýrýhanaǵa jetkizildi. Onyń bas terisi sypyrylyp, denesi aýyr jaraqattanǵan kórinedi. Operasııadan keıin dárigerler onyń jaǵdaıy birqalypty ekenin habarlady.
Aıdar О́risbaev.