Qazaqstan Respýblıkasynyń Mádenıet jáne sport mınıstri Aqtoty Raıymqulova jáne Eńbek Eri Asanáli Áshimov bastaǵan óner qaıratkerleri búgin paıdalanýǵa berilgen «Kóne-Taraz» tarıhı-etnomádenı keshenindegi «Rýhanııat jáne tarıhtaný» ortalyǵyna keldi. Mınıstrge jáne óner tulǵalaryna atalǵan otralyqtyń dırektory Saýran Qalıev jańa ashylǵan nysannyń búgingi tynysy men bolashaq josparyn baıandady.
«Rýhanııat jáne tarıhtaný» ortalyǵy Qazaqstannyń Halyq jazýshysy Sherhan Murtaza atymen atalady. Atalǵan ortalyqta búginde Jambyl óńirine qatysty rýhanı qundylyqtar, tarıhı tanymdar, salt-dástúr, joralǵylarymyzdyń bári kórinis tapqan. Aldaǵy ýaqytta ortalyqta jergilikti aıtyskerler men jazba aqyndardy, jalpy qalamgerlerdi qoldaý boıynsha sharalar turaqty túrde uıymdastyrylatyn bolady. Atalǵan ortalyqqa Sherhan Murtazanyń esimin berý usynylyp, bul usynys Respýblıkalyq onomastıkalyq komıssııadan qoldaý tapty. Búgingi tańda Úkimet qaýlysynyń jobasy daıyndalýda eken. Bul oraıda shyǵystyq sáýlet úlgisinde salynǵan ǵımarattyń kireberisinde Sherhan Murtazanyń gorelef músini ornatylǵan. Ǵımarat eki qabattan turady. Nysannyń birinshi qabatynda úlken jáne kishi májilis zaldary bar. Munda zııaly qaýym ókilderi men buqaralyq aqparat quraldary, qoǵam belsendileri, oblys turǵyndary men qonaqtary bas qosatyn bolady.
Sondaı-aq birinshi qabatta jańa ashylǵan amfıteatrda óz ónerin halyq nazaryna usynatyn ónerpazdardyń grım bólmeleri de ornalasqan. Al, ortalyqtyń ekinshi qabatyndaǵy úlken holda Sherhan Murtazanyń shyǵarmashylyǵyna arnalyp kompozısııa jasalǵan. Kompozısııanyń astynda áıgili qalamger otyrǵan eki kreslo men jýrnal stoly qoıylǵan. Holdyń eki jaq qabyrǵalaryndaǵy kórme sórelerinde jazýshynyń kózi tirisinde oblystyq kitaphanaǵa syıǵa tartqan zattary kópshilik nazaryna usynyldy. Munda jazýshy paıdalanǵan jazý mashınkasy, sývenırlik qalamy, ıissý qutysy, kilemshesi, shapany, mantııasy, portfeli, tipti jeke «Kıev» fotoapparaty, túrli marapattary, kýálikteri jáne ózge de jeke basyna qatysty qujattary qoıylǵan. Ortalyq «Tarıhtaný jáne Sherhantaný» atty eki bólimnen turady. «Tarıhtaný» bólimi negizinen Jambyl óńirindegi ejelgi dáýirden búgingi kúnge deıingi ótken tarıhymyzdy zerttep, zerdelep, arhıv qujattary jáne tarıhı jazba derekkózderi arqyly naqty faktilerdi jınaqtasa, «Sherhantaný» bólimi ádebıetti, tarıhty, etnografııany, ańyz-áńgimelerdi, jyr-dastandardy jáne aqyn-jyraýlardyń eńbekterin júıeli túrde zerdelep, aqyn, jazýshy, aıtysker, sazger, tarıhshy jáne ólketanýshylardyń eńbekterinen altyn qor qalyptastyrýdy qolǵa alady. Bul bólimde salt-dástúr, halyq aýyz ádebıeti jáne ádebı shyǵarmalar, dástúrli mýzyka, sherhantaný shyǵarmashylyq zertteý bólmeleri biriktirilgen. Munda keleshekte Sherhan Murtazanyń muralary týraly aqparattar toptastyrylyp, broshıýra daıyndaý, beınerolıkter ázirleý de josparda bar.