Italııalyq «Eni» kompanııasy Qarǵaly aýdanynda jel elektr stansasynyń birinshi kezeńin iske qosty.
Atalǵan nysan ekologııalyq turǵydan taza elektr energııasyn óndiredi. Osy turǵyda Aqtóbe oblysynda balamasy joq qanatqaqty jobanyń alǵashqy kezeńi júzege asty. Bul ınvestısııalyq qurylym oblys ekonomıkasynyń áleýetin odan ári nyǵaıtýǵa septigin tıgizedi, – dedi atalǵan jobaǵa qoldaý kórsetken «Kazakh invest» UQ AQ basqarma tóraǵasynyń orynbasary Birjan Káneshev.
Jel elektr stansasynyń jyldyq qýaty 48 MBT-qa teń bolsa, jalpy quny 33 mıllıard teńgeni quraıdy. Jańa nysan shırek ǵasyr ishinde jyl saıyn 200 GVt-ǵa jýyq elektr qýatyn óndiredi dep kútilýde. Bir sózben aıtqanda, 20 myń adamdy jaryq kózimen qamtamasyz etýge qaýqarly. Iаǵnı Qarǵaly aýdany turǵyndary men óndiristik jáne sharýashylyq nysandardy elektr energııasymen tolyqtaı qamtýǵa jetedi. 2020 jyly jel elektr stansasynyń ekinshi kezeńi de aıaqtalyp, tolyq qýatynda iske qosylmaq.
«Biz sheteldik ınvestorlarǵa bıznes júrgizýge qajetti jaǵdaıdy týǵyzý úshin barlyq múmkindikti qarastyryp kelemiz. Osy umtylysymyzdyń nátıjeleri de joq emes. Munyń jarqyn mysaldarynyń biri – ıtalııalyq «Eni» kompanııasynyń óńirde jasaǵan qarqyndy is-qımyly deýge bolady. Olardyń jobaǵa júz mıllıon dollardan astam qomaqty ınvestısııalyq qarajat salýy jergilikti atqarýshy organdar tarapynan jasalǵan qoldaýdyń bir kórinisi bolmaq», dedi stansanyń ashylý rásimi kezinde Aqtóbe oblysynyń ákimi Ońdasyn Orazalın.
Aqtóbe oblysy,
Qarǵaly aýdany