Senat otyrysynda zańnamaǵa jer qoınaýyn paıdalaný, gaz jáne gazben jabdyqtaý máseleleri jónindegi túzetýler ekinshi oqylymda qaraldy. Bul týraly Parlament Senatynyń baspasóz qyzmeti habarlady.
Baıandama jasaǵan senator Manap Kóbenov zań jobasy ekonomıkaǵa ınvestısııa tartýǵa jáne qosymsha quny joǵary ári aıtarlyqtaı mýltıplıkatıvti áseri bar munaı-hımııa óndirisin damytýǵa arnalǵanyn atap ótti. Bul rette gazben ishki naryqty úzdiksiz jabdyqtaýdy, sondaı-aq gaz baǵasynyń turaqty deńgeıin qamtamasyz etý úshin jańa strategııalyq mańyzdy ınvestısııalyq jobalarǵa taýarlyq gazdyń shekti baǵasy zań jobasy aıasynda gaz jetkizýdiń ózindik quny men gaz jáne gazben jabdyqtaý salasyndaǵy ulttyq operatordyń («QazTransGaz»AQ) eń tómengi tıimdilik normasynan qalyptasatyn bolady.
Elektr energııasyn óndirýge otyn retinde taýarlyq gazdy paıdalanatyn elektr stansııalaryn salýǵa ınvestısııalar tartý úshin gazǵa uzaq merzimdi kezeńge (on jylǵa deıin) qolaıly baǵa belgileý usynylady.
Odan basqa, kómirsýtegiler boıynsha jer qoınaýyn paıdalaný quqyǵyn berýge aýksıon ótkizý tetigine ózgerister engiziledi. Zań jobasyn qabyldaǵannan keıin operator aýksıondardy elektrondyq sıpatta júrgizedi. Aýksıon jeńimpazyn taný jónindegi fýnksııalar komıssııada saqtalady. Sondaı-aq elektrondyq aýksıondar operatorynyń qyzmeti retteledi.
Senatorlar jer qoınaýyn paıdalaný, gaz jáne gazben jabdyqtaý máseleleri boıynsha zańnamaǵa túzetýlerdi ekinshi oqylymda qarap, qabyldady.
Senatorlar sondaı-aq temir jol kóligi máseleleri jónindegi zańnamaǵa túzetýlerdi de qabyldady.
Senator Erik Sultanov óz baıandamasynda zań jobasymen normatıvtik quqyqtyq aktilerdi ázirleý jáne bekitý jónindegi tarıf belgileý ashyqtyǵyn jetildirý jáne arttyrý, kirme joldardy sýbsıdııalaý jáne qyzmetterin paıdalanýshylar quqyqtaryn qorǵaý boıynsha memlekettik organdardyń ókilettikteri tolyqtyrylatynyn atap ótti.
Qujatta jol júrý qujattaryn qaıta satý jáne temirjol kóligindegi qozǵalys qaýipsizdiginiń qamtamasyz etilmegeni úshin ákimshilik jaýapkershilikti kúsheıtý kózdelgen.