Oblystyq sybaılas jemqorlyqqa qarsy is-qımyl departamentiniń Antikor servıstik ortalyǵynyń ashylý saltanatyna oblys ákimi Arhımed Muhambetov, Sybaılas jemqorlyqqa qarsy is-qımyl agenttiginiń apparat jetekshisi Qýanysh Japaqov jáne memlekettik qyzmetkerler, ardagerler qatysty.
Memlekettik organdar «Open spase» formatynda ashyq jumys isteıdi, oblys boıynsha azamattarǵa qoljetimdi memlekettik qyzmet kórsetýde qolaıly jaǵdaı týǵyzýǵa arnalǵan «Adaldyq alańy» front ofısteri jumys istep jatyr. Ashylyp otyrǵan Antikor servıstik ortalyǵy da osy maqsatty jalǵastyratyn bolady. Oblys ákimi Arhımed Muhambetov jańa servıstik ortalyqtyń ashylýy qoǵamyndaǵy ashyqtyq pen ádildikti qamtamasyz etýde mańyzdy ekenin aıtty.
«Memleket basshysy Qasym-Jomart Toqaev Qazaqstan halqyna joldaǵan Joldaýynda qoǵamdyq dıalogty, ashyqtyqty jáne adamdardyń ótkir, jedel máselelerine der kezinde kóńil bólýdi quqyq qorǵaý jáne atqarý organdaryna tapsyrǵan bolatyn. Sol tapsyrma údesinen shyǵý úshin biz birlesip osy servıstik ortalyqty ashyp otyrmyz. Munda kásipkerler men jalpy turǵyndarǵa keńes berý úshin bilikti mamandar jumys isteıtin bolady. Jalpy sybaılas jemqorlyqtyń aldyn alý úshin qarqyndy jumystar júrgiziledi» dedi Arhımed Begejanuly.
Oblystyń barlyq óńirinde «Open spase» baǵytymen 49 ashyq kabınetter jumys istep tur. «Adaldyq alańy» front ofıs jobasy sheńberinde front keńseler búginge deıin Qostanaı, Arqalyq qalalarynda, Meńdiǵara aýdanynda ashyldy. Aldaǵy kúnderi ol Rýdnyı qalasynda da jumysyn bastaıdy.
«Búgingi ashylyp otyrǵan Antikor servıstik ortalyǵy tek sybaılas jemqorlyqqa qarsy kúres qyzmetine arnalǵan ǵana emes, qoǵamdaǵy qolaısyz kórinis, indet bolyp tabylatyn jemqorlyq pen paraqorlyqqa tóze almaıtyn jalpy jurtshylyq, uıymdar úshin jumys alańy bolsa dep oılaımyn» dedi Sybaılas jemqorlyqqa qarsy is-qımyl agenttiginiń apparat jetekshisi Qýanysh Japaqov. Bul ortalyqtan kez kelgen adam sybaılas jemqorlyqqa qarsy jáne óz quqyn qorǵaý úshin zańdyq keńester ala alady.