«Meıirimdilik shapaǵaty» atty qaıyrymdylyq telemarafonyna oblys ákimi Qýanyshbek Ysqaqov qatysyp, óńirde halyqtyń áleýmettik osal toptaryn qoldaýǵa arnalǵan sharalar jaıly aıtyp ótti.
Telemarafon Almaty qalasy mańynda ushaq apatynan qaza tapqandar rýhyna arnalǵan bir mınýttyq únsizdik rásiminen bastaldy.
Jyl basynda kópbalaly jáne az qamtylǵan otbasylarǵa qosymsha kómek kórsetýdi uıymdastyrý úshin 2019-2021 jyldarǵa arnalǵan óńirlik Áleýmettik jol kartasy qabyldanǵan. Onda tabysty arttyrý jáne halyqtyń az qamtylǵan toptaryn qoldaý, tabysy tómen azamattardyń baspana máselesin sheshý jáne bilim berý men densaýlyq saqtaý salalaryn jaqsartý, sondaı-aq, óńirlerdi keshendi damytý baǵytyndaǵy aýqymdy is-sharalardy júzege asyrý sharalary kózdelip otyr. Ol úshin bıýdjetten 42 mlrd teńgeden astam qarajat bólingen. Onyń ishinde ataýly áleýmettik kómektiń mólsheri ulǵaıtylyp, barlyǵy 31 myńnan astam otbasyna 20 mlrd teńgege jýyq kómek kórsetildi.
Osy baǵyttaǵy basqa da bastamalardy aıtyp ótken aımaq basshysy osy qaıyrymdylyq sharasynyń mańyzdylyǵyna aıryqsha toqtaldy.
– Meıirimdilik – izgiliktiń joly. Rııasyz jasalǵan jaqsylyq – bıik adamgershiliktiń belgisi. Búgingi shara aıasynda jomart júrek azamattardyń tikeleı qoldaýymen qala boıynsha áleýmettik jaǵynan az qamtylǵandarǵa, asyraýshysynan aırylǵan jandarǵa, qarttar men ata-ana qamqorlyǵynsyz qalǵan balalarǵa, kópbalaly, turmysy tómen otbasylarǵa azyq-túlik túrinde kómek kórsetildi. Memlekettik qyzmetkerler men jekelegen azamattar ózderiniń bir kúndik jalaqysyn aýdaryp, 4 mln teńgeden asa qarjylaı kómek berdi. 2013 jyldan beri kópbalaly jáne az qamtylǵan otbasylardyń balalaryn, ásirese, aýyldyq jerden shyqqan talapty túlekterdi oqytýǵa oblys ákiminiń arnaıy grantyn taǵaıyndap kelemiz, búgingi kúni myńnan asa mektep túlegi grant ıegeri atandy. Apatty jaǵdaıdaǵy úıler men jataqhanalarda turyp kelgen otbasylardy jańadan salǵan úılerge qonystandyrý úrdisimizge aınaldy. Qyzylorda oblysy áleýmettik salaǵa qarjy bólýden aımaqtar arasynda kósh bastap tur,- dedi oblys ákimi Q.Ysqaqov.
Aıta ketý kerek, osyndaı qaıyrymdylyq sharalary jyl kóleminde úzdiksiz uıymdastyrylyp keledi. Sonyn ishinde osy jeltoqsan aıynda ataýly merekelerge oraı áleýmettik osal toptaǵy otbasylarǵa kómek kórsetildi.