Almaty oblysynda apatqa ushyraǵan ushaqtyń qara jáshigi Memleketaralyq avıasııa komıtetine beriledi. Bul týraly Ortalyq kommýnıkasııalar qyzmetiniń baspasóz alańynda Indýstrııa jáne ınfraqurylymdyq damý vıse-mınıstri Berik Kamalıev aıtty.
«Keshe QR Premer-Mınıstriniń orynbasary Roman Sklıar Memleketaralyq avıasııa komıtetiniń tóraǵasymen sóılesti. Ýaǵdalastyq boldy, búgin keshkisin, saǵat 18-40-ta Máskeýden Almatyǵa sarapshy ushyp kelip, jumysqa kirisedi. Jedel tergeý toby jumys istep jatyr. Jedel tergeý toby áýe kemesi bortynyń ózdiginen jazý quralyn aldy. Erteń biz qara jáshikti mán-jaıdy anyqtaý úshin Máskeý qalasyndaǵy Memleketaralyq avıasııa komıtetine beremiz», - dedi Berik Kamalıev.
Vıse-mınıstrdiń aıtýynsha, qara jáshiktegi jazbalardy zertteý jumystary dúısenbi bastalady.