Sandyqtaý aýdany ákimininiń júldesi úshin voleıboldan erler arasyndaǵy dástúrli týrnır ótti. Bul joly oblysymyzdyń birneshe aýdandarynan kelgen komandalar kúsh synasty.
Osydan birneshe jyl buryn Balkashıno selosynda boı kótergen sporttyq saýyqtyrý kesheni ártúrli jarystar ótkizip, jattyǵýlar jasaýǵa mol múmkindik týǵyzyp otyr.
–Aýdan ákiminiń júldesi irgeles aýdandardaǵy voleıbolshylardy da qyzyqtyrady. Sondyqtan jarysqa qatysýshylardyń sany jyl ótken saıyn kóbeıip keledi. Ásirese, jastarmen qatar sport ardagerleri de voleıbol alańynda ádemi oıyn kórsetýde, deıdi jarystyń tóreshisi Vıktor Karpov.
Jarys barysynda jiger janıtyn sátter az bolǵan joq. Árıne, qaırat pen qajyr tarazy basyn teń tartqan sátter de kórinis tapty. Qalaı bolǵanda da sport dese isher asyn jerge qoıatyn kópshiliktiń basyn qosqan dýmandy oqıǵa boldy.
–Bıyl komandalar sany kóbeıdi. Sondyqtan jarys óte qyzyqty ótýde. Men ardagerler komandasyna jetekshilik etemin. Aramyzda voleıbol oınaýdy jettik meńgergen zamandastarym az emes. Maqsat jeńis emes, buqaralyq sportty damytý dep oılaımyn, deıdi sport ardageri Berik Qanafın.
Tartysty ótken týrnır barysynda tamasha oıyn kórsetken Býrabaı aýdanynyń komandasy jeńiske jetti. Ekinshi oryndy Sandyqtaý aýdany ákimi apparatynyń jigitteri enshiledi. Úshinshi júldeni Sandyqtaý selosynan kelgen voleıbolshylar aldy.