Alaqany kúrekteı bolsa da,
Minezi jibekteı
Keýdesi túbekteı bolsa da,
Kókiregi oıaý,
Kózderi janyp turǵan shamdaı.
О́zi iri, sózi maıda tanysym bar edi,
Jolynda júk qalmaǵan,
Jelip júrgen nar edi.
Sol tanysymdy,
Jańa jylda – tanymaı qaldym.
«Toıys» men emes, ol tanymaı qaldy.
Amandasýǵa sozǵan qolymdy,
Qol emes, kóseý kórgendeı,
Tyrjıyp amalsyzdan aldy.
Ne degenin ózi de bilmeıdi,
Aýzyn qybyrlatyp, ernin jybyrlatyp,
Sóz aıtýdan qaldy.
Buryn saýsaqtarymen sytyrlatyp,
Barmaǵymdy bytyrlatyp,
Qolymdy qysyp, qýanyp qalatyn.
Qabyrǵamdy qaýsata,
omyrtqamdy opyra,
Esimdi jıǵyzbaı,
eriksiz qushaqtap alatyn.
Endi, bet-aýzy «betondanyp», bedireıip,
It qýǵan eshkideı edireıip, shoshyp ketti.
Kóziniń oty óship
Túrinen tirshiliktiń nyshany kóship ketti.
Tanaýyn kókke kóterip, toqtaı almaı,
«Toplıymdy» basyp ketti.
Baqsam baqa eken, Jańa jylda –
Tanysymnyń qyzmeti ósken eken.
Sóıtip kishipeıildiliktiń aýylynan
kóshken eken.
Bizde osyndaı alýan-alýan tanys bar,
Mende ony sizderge tanystyratyn
«shans» bar.
* * *
«Bıdaıdyń kókiregin kótergeni –
daqyly joqtyǵy,
Jigittiń kókiregin kótergeni –
aqyly joqtyǵy» –
Degen sóz osyndaılarǵa arnalǵan,
Rahmet aıtamyz, oqyrmanǵa tyńdaǵan.
Marat KО́PTILEÝOV
Qyzylorda oblysy