Balqash qalasynda «Halyq banki» men «Halyq» jeke qaıyrymdylyq qory múmkindigi shekteýli jandarǵa «Invataksı» mamandandyrylǵan avtomobılin syıǵa tartty. Bul kólik jergilikti múgedekterge tegin qyzmet kórsetetin bolady.
Qazirgi tańda Balqash qalasynda múmkindigi shekteýli 3860 adam turady. Olardyń 100-den astamy arnaıy avtokólik arqyly tasymaldaý qyzmetine zárý.
–Tasymaldaý boıynsha qyzmetter memlekettik áleýmettik tapsyrys qarajaty esebinen júzege asyrylady. 2019 jyly bul maqsatqa 3 mln 600 myń teńge bólindi. 2020 jyly qarjylandyrý kólemi 35%-ke artty, deıdi Balqash qalasynyń ákimi Oraz Táýirbekov.
Eske salsaq, «Halyq» qaıyrymdylyq qory «Halyq bankimen» birge 2018 jyldan bastap elimizde «Invataksı» jobasyn júzege asyrýmen júıeli túrde aınalysyp keledi. Alǵashqy jyly Qazaqstannyń iri qalalary úshin 21 mamandandyrylǵan avtokólik satyp alynsa, ótken jyly shaǵyn jáne monoqalalardaǵy múgedek jandarǵa 15 ınvataksı syıǵa tartyldy.