2020 jyldyń 1 qańtarynan bastap múmkindigi shekteýli jandar áleýmettik qyzmetter portalynan ómir súrýde róli asa mańyzdy 24 tehnıkalyq kómekshi quraldar túrin óz betinshe satyp ala alady.
Áleýmettik qyzmetter portalyn paıdalaný úshin múmkindigi shekteýli azamattar ortalyqqa kelip, elektrondy sıfrlyq qoltańbany alý kerek. Munda arnaıy ózine-ózi qyzmet kórsetý aımaqtary qurylǵan, mundaı aımaqtar oblystyq jumyspen qamtý ortalyqtary janynda da bar. Gúlim Baıqoshqarova úshinshi toptaǵy múgedek. Týǵannan estý qabiletinen aırylǵan jan. Mektepte estý apparatynyń kómegimen bilim alyp, 90-shy jyldary «Farfor» zaýytynda jumys istegen. Búginde eki bala tárbıelep, nemereleriniń qyzyǵyn kórip otyr. Gúlim Baıqoshqarovanyń aıtýynsha, qarapaıym adamdar úshin ár kún bir qalypta bastalatyn bolsa, onda basqasha.
Mamandardyń aıtýynsha, tıflotehnıkalyq jáne basqa da quraldarmen qamtamasyz etý boıynsha qarjylandyrý ótken jyldarmen salystyrǵanda, 2019 jyly 141 mıllıon teńgege artqan.
–2014 jyldan bastap jyl saıyn kórý, estý qabileti nashar adamdarǵa arnalǵan jol belgilerin ornatý, jaıaý júrginshiler ótkelderin qaıta jabdyqtaý úshin respýblıkalyq transfert bólinedi. Sondaı-aq áleýmettik jáne kóliktik ınfraqurylym nysandarynda kedergisiz orta qurýǵa qatysty 1772 jumys júrgizilýde. Qazirgi ýaqytta barlyq fızıologııalyq qajettilikterdi eskere otyryp, beıimdelýdiń qosymsha sharalar kesheni boıynsha jumys júrip jatyr,–deıdi oblystyq jumyspen qamtý jáne áleýmettik baǵdarlamalardy úılestirý basqarmasynyń bólim jetekshisi Ásem Ilııasova.
Búginde Kókshetaý qalasynda zaǵıp adamdarǵa arnalǵan birneshe áleýmettik mańyzdy nysandar jabdyqtalǵan. Atap aıtsaq, Áýelbekov kóshesi men Nazarbaev dańǵyly boıyndaǵy eki emhana, qos birdeı teatr, «Dostar», «Kókshetaý» mádenıet saraılary men temirjol vokzaly. Bul jumys «Jol kartasy-2023» baǵdarlamasy aıasynda jalǵasyn tappaq. 2014 jyldan bastap oblys boıynsha 341 belgi qoıylyp, 32 jaıaý júrginshiler joly qaıta jabdyqtalǵan.
–Jyl saıyn qolǵa alynyp otyratyn múgedekterdiń «Kedergisiz ortasyn qamtamasyz etý» baǵdarlamasy bar, óńirdiń árbir aýdandary men qatar oblys ortalyǵynda dybys baǵdarshamdaryn ornatýǵa qarjy bólinedi. Jyl saıyn kem degende 2 baǵdarsham iske qosylady, deıdi oblystyq jolaýshylar kóligi jáne avtomobıl joldary basqarmasy jetekshisiniń orynbasary Vladımır Kýlakov.