Jemqorlyqqa qarsy kúreste jeńiske jetýdiń bir jol onyń saldaryn anyqtaý emes, sebepterine úńilý bolsa kerek. Bul adamnyń para berýge, para alýǵa jáne sybaılastyqqa, tamyr-tanystyqqa júginýge degen teris kózqarasyn túbirimen joıýǵa bastaıtyn izgi ádetti qalyptastyrmaq. Osy baǵytta elimizdiń Sybaılas jemqorlyqqa qarsy kúres agenttigi aıtýǵa turarlyq jumys atqaryp otyr.
Sybaılas jemqorlyqqa qarsy kúresti memlekettik qyzmet salasyndaǵy zańsyzdyqtardy áshkerelep, júıeni nıeti buzylǵan sheneýnikterden tazalaý da ońaı sharýa emes. Ol úshin uzaq zertteý, saraptaýmen qatar ar men zań aldyndaǵy jaýapkershilikti seziný alǵa shyǵýy tıis. Aımaqtardaǵy jumys barysynda Sybaılas jemqorlyqqa qarsy kúres agenttiginiń qyzmetkerleri osy ustanymdy basshylyqqa alady. Nátıjesinde, sheneýnikter arasyndaǵy zań buzýshylyq faktileri jıi anyqtalýda. Naqty aıtqanda, 2019 jyly Almaty oblysynyń sybaılas jemqorlyqqa qarsy kúres qyzmeti 141 qylmysqa qatysy bar derek tirkegen eken. Onyń ishinde 101 is jemqorlyqqa qatysty qozǵalǵan. Iаǵnı, sybaılas jemqorlyqqa qatysty kúdikke iliný deregi barlyq qylmystyq isterdiń 71,6 paıyz qurap otyr. Atap aıtqanda, ótken jyl boıy 81 para alý oqıǵasy áshkerelenip, qyzmet babyn asyra paıdalanýdyń 11 deregi anyqtalǵan. Nátıjesinde, jekelegen tulǵaǵa qatysty 63 qylmystyq is ashylyp, 43 adam sottalǵan. Jaýapqa tartylǵan qyzmetkerler arasynda 6 oblystyq deńgeıdegi basshy, 5 orta sanattaǵy laýazymdy tulǵa bar. Búginge deıin 87 is sotqa jiberilipti. Sondaı-aq sheneýnikter tarapynan shaǵyn jáne orta bıznes nysandaryna qysym jasaý azaımaı otyrǵan kórinedi. Dál osyndaı mazmundaǵy 17 shaǵym qabyldanyp, 13 laýazym ıesi jaýapkershilikke tartylǵan. 35 kásipkerdiń quqy qorǵaldy.
Aıtpaqshy, oblystaǵy sybaılas jemqorlyq derekteri jıi baıqalatyn qyzmetterdiń kóshin ákimdik qyzmetkerleri bastap turǵany ókinishti. О́tken jyldyń 11 aıynda sheneýnikterdiń para alýyna qatysty 26 oqıǵa anyqtalǵan. Jer qatynastary bóliminiń qyzmetkerleri de ákimdik ókilderinen qalyspapty. Olarǵa qatysty 2019 jyldyń jeltoqsan aıyna deıin 12 derek tirkelgen. Al jaqynda Almaty oblystyq departamentiniń mamandary júrgizgen zertteý boıynsha Taldyqorǵan qalasy ákimdiginiń turǵyn-úı kommýnaldy sharýashylyǵy bólimi jemqorlyqqa beıim orta retinde baǵalanǵan. Bul týraly Sybaılas jemqorlyqqa qarsy kúres agenttigi Almaty oblystyq departamenti basshysynyń birinshi orynbasary Jandos Jumabaev málimdedi.
– Memlekettik qyzmetkerler arasyndaǵy jemqorlyq táýekelin anyqtaý boıynsha arnaıy monıtorıng júrgizgen bolatynbyz. Onyń nátıjesine saraptama jasaǵanda birqatar másele bary belgili boldy. Taldyqorǵan qalasy boıynsha aıtar bolsaq, turǵyn-úı kommýnaldy sharýashylyǵy bóliminiń jumysyna jasalǵan zertteý bul ortadadaǵy jemqorlyq táýekeliniń 9 deregin anyqtady, – deıdi Jandos Jumabekov.
Saraptama nátıjesinde Taldyqorǵan qalalyq turǵyn-úı kommýnaldy sharýashylyǵy bólimi qyzmetkerleri tarapynan quqyq buzýshylyqqa jıi jol beriletindigi aıqyndalǵan eken. Onyń ishinde baspana kezegine qatysty shaǵymdanýshylar kóp. Bólim qyzmetkerleriniń turǵyn úı kezegin zańsyz ózgertý, memlekettik turǵyn úı qorynan úı alý erejesin óreskel buzý, qarapaıym turǵyndardyń kepildi quqyǵyn aıaqasty etý, memlekettik qyzmet kórsetý talabyna sáıkes aryz-shaǵymdardy qaraý tártibin saqtamaý sııaqty aıyptary kózge uryp tur eken. Aıtpaqshy, qazir arnaıy organ qyzmetkerleri turǵyn úı qorynan berilgen qyzmettik páterlerdiń zańdylyǵyn da tekserýge kirisipti. Oǵan kommýnaldyq menshiktegi páterlerde zańdy ıeleriniń qonystanbaǵany jáne olardyń kommersııalyq maqsatta jalǵa beriletini jaıly turǵyndar tarapynan túsken aryz-shaǵym negiz bolyp otyr eken.
Jalpy, Jetisý óńirindegi sheneýnikterdiń jumysyna qatysty syn Bas prokýratýraǵa qarasty Quqyqtyq statıstıka jáne arnaıy esepke alý komıteti tarapynan da aıtylǵan. Osy komıtettiń Almaty oblysy boıynsha basqarmasy mamandary málimdegendeı, 2019 jyldyń 9 aıynda turǵyndarǵa tıisinshe qyzmet kórsetý erejesin buzǵan 24 ákimdik mamanyna qatysty quqyqtyq hattama toltyrylǵan. Bul boıynsha 40 memlekettik qyzmetshi tártiptik jaýapkershilikke tartylǵan. Al turǵyndardyń memlekettik qyzmet alýǵa qatysty quqyǵy baspana kezegi men jer telimine qatysty jıi buzylady eken. Byltyr oblys turǵyndarynan arnaýly qyzmet alýǵa qatysty 70 myńnan astam ótinish tússe, onyń ishinen 174 ótinishtiń qaralý merzimi men oryndalýyna qatysty sheshim shyǵarylýy qasaqana shegerilip, ýaqytyn sozý deregi anyqtalǵan.
Almaty oblysy