Úkimet úıinde Premer-Mınıstrdiń orynbasary Berdibek Saparbaevtyń tóraǵalyǵymen zeınetaqy júıesin odan ári jetildirý boıynsha jumys tobynyń kezekti otyrysy ótti.
Otyrysqa Eńbek jáne halyqty áleýmettik qorǵaý mınıstri Birjan Nurymbetov, «Qazaqstan qarjygerler qaýymdastyǵy» ZTB keńesiniń tóraǵasy Elena Bahmýtova, «First Heartland Jysan Bank» AQ Dırektorlar keńesiniń múshesi Bolat Jámishev, Prezıdenttiń shtattan tys keńesshileri Tamara Dúısenova jáne Oljas Qudaıbergenov, sondaı-aq memlekettik organdar men úkimettik emes uıymdardyń, «Atameken» UKP ókilderi, sarapshylar men qoǵam qaıratkerleri qatysty.
«Jalpy, Memleket basshysy jumys tobynyń usynystaryn qoldady. Endi Prezıdenttiń tapsyrmalaryn eskere otyryp, jumysymyzdy jalǵastyrý qajet. Onyń ishinde zeınetaqy júıesin odan ári jańǵyrtýdy jedeldetý, ákimshilik shyǵyndardy qysqartý, eń tómengi jalaqy kólemin jáne jınaqtaýshy zeınetaqy júıesiniń tıimdiligin arttyrý máselesin pysyqtaý kerek» dedi B. Saparbaev.
Sonymen qatar jumys toby zeınetaqy jınaqtarynyń bir bóligin paıdalaný bastamasyn iske asyrý boıynsha jumystardy jalǵastyrady.
«Turǵyn úı satyp alý jáne qymbat turatyn emge aqy tóleý úshin zeınetaqy jınaqtaryn paıdalaný usynysyna qoldaý bildirildi. Bul quqyqty paıdalana alatyn azamattardy kezeń-kezeńmen qamtýdy arttyrýdy eskerýmen qosymsha esepteýler júrgizý qajet» dedi vıse-premer.
Otyrysty qorytyndylaǵan Berdibek Saparbaev bıylǵy qańtar aıynyń sońyna deıin mindetterdi, merzimderi men jaýapty tulǵalardy kórsetýmen Jol kartasynyń jobasyn ázirleýdi tapsyrdy.