Keshe Memleket basshysy Nursultan Nazarbaev munaı jáne gaz mınıstri Uzaqbaı Qarabalındi qabyldady, dep habarlady Prezıdenttiń baspasóz qyzmeti.
Kezdesý barysynda U.Qarabalın Memleket basshysyna mınıstrliktiń munaı men gaz óndirý, munaı-hımııa ónerkásibi jáne kómirsýtek shıkizatyn tasymaldaýdy qamtamasyz etý tárizdi salalardaǵy qyzmeti týraly baıandady.
Sonymen qatar, Qashaǵan, Teńiz jáne Qarashyǵanaqty qosqanda, iri ken oryndaryn ıgerýge baılanysty máseleler talqylandy. Teńiz jobasynda, sondaı-aq, ózge de bolashaq ken oryndaryn ıgerý barysynda elimizdiń múddesin meılinshe eskerý qajettigine basty nazar aýdaryldy.
Memleket basshysy Qazaqstan úshin strategııalyq salanyń biri bolyp sanalatyn munaı-gaz salasyn odan ári damytý qajettigin atap ótti.
– Búgingi kúni Qashaǵan ken ornynan munaı óndirýdi bastaýǵa daıyndyq prosesi josparǵa sáıkes júrgizilýde. Munaı jáne gaz mınıstrligine úlken jaýapkershilik júkteledi. Onyń qyzmeti jetildirilip, tıimdiligi arttyrylatynyna senemin. Sondaı-aq, mınıstrlik tájirıbe jáne tehnologııalar almasý úshin kórshiles elderdegi seriktesterimen tyǵyz yntymaqtastyqta bolýy qajet, – dedi Qazaqstan Prezıdenti.
О́z kezeginde U.Qarabalın salany damytýdyń oń qarqyny týraly habardar etti.
– 2013 jyldyń birinshi jartyjyldyǵynyń qorytyndysy boıynsha munaı jáne gaz kondensatyn óndirý 40 mıllıon tonnadan astamdy qurap, 2012 jyldyń tıisti kezeńimen salystyrǵanda 101,8 paıyz boldy. Sonymen birge, tabıǵı jáne ilespe gaz óndirý josparlanǵan kestege saı júrgizilýde. Munaı-gaz ónimderin eksporttaý jónindegi josparlar, jalpy alǵanda, oryndalýda, jekelegen kórsetkishter jyl aıaǵyna deıin teńestiriletin bolady, – dedi Munaı jáne gaz mınıstri.
U.Qarabalın Kaspııdiń qazaqstandyq qaırańynyń Jambyl ýchaskesindegi jumystary týraly da málim etti.
– Jambyl qurylymyndaǵy barlaý uńǵymasyn synaqtan ótkizý kezinde táýligine 60 tonna munaı aǵyny alyndy. Biz bul nysandy zertteýdi odan ári júrgize beremiz, biraq qazirdiń ózinde jańa ken orny tabylǵandyǵy týraly aıta berýge bolady, soǵan oraı Sizdi quttyqtaǵym keledi. Munaıshylar jáne bizdiń bárimiz úshin bul óte qýanyshty oqıǵa, – dedi Munaı jáne gaz mınıstri.
Kezdesý qorytyndysynda Memleket basshysy birqatar naqty tapsyrmalar berdi.