Prezıdent Abý Dabı Ámirligin bıleýshi áýletiniń ókili, Birikken Arab Ámirlikterindegi iri bıznes ókili, «Etihad Towers» kópfýnksıonaldy kesheniniń ıesi, «First Abu Dhabi Bank» aksıoneri sheıh Sýrýr ben Muhammed Ál Nahaıanmen kezdesti. Bul týraly Aqordanyń baspasóz qyzmeti habarlady.
Kezdesýde Memleket basshysy Birikken Arab Ámirlikteri Qazaqstannyń Taıaý Shyǵystaǵy senimdi seriktesteriniń biri ekenin, sapar barysynda Abý Dabıdiń taq murageri, sheıh Muhammed ben Zaıd Ál Nahaıanmen ekijaqty yntymaqtastyqty odan ári damytýǵa ýaǵdalasqandaryn atap ótti.
Sheıh Sýrýr ben Muhammed Ál Nahaıan Qazaqstan Prezıdentine óziniń «West Hydrocarbons Commercial Investment LLC» kompanııasynyń Batys Qazaqstan oblysynda munaı óńdeý zaýytyn salyp jatqanyn aıtty. Aldaǵy ýaqytta da bizdiń elimizben birlesip jumys isteýge, jańa jobalarǵa ınvestısııa salýǵa nıet bildirdi.