Mańǵystaý oblystyq stomatologııalyq emhanasynyń qyzmetkerleri «Kóz jaýyn alatyn ómir boıyna arnalǵan kúlki» atty aýqymdy aksııasyn ótkizdi. Bul jaıynda Mańǵystaý oblystyq Densaýlyq saqtaý basqarmasynyń baspasóz qyzmeti habarlady.
Sońǵy bir aıda 1-synyp oqýshylaryna jalpy sany 1751 tis pastasy men tis qylshaǵy salynǵan paketter, al keıbir oqýshylarǵa maqtaý qaǵazdary berildi. Shara aıasynda Aqtaý qalasyndaǵy № 3, 5, 20, 21, 28 orta mektepter jáne Munaıly aýdany Qyzyltóbe aýylyndaǵy orta mekteptiń biri qamtylǵan bolatyn.
Mańǵystaý oblystyq stomatologııalyq ortalyǵynyń dırektory Qýat Mashyryqovtyń aıtýynsha, «Kóz jaýyn alatyn ómir boıy kúlki» - bul 1-3-synyp oqýshylaryna arnalǵan taǵylymdyq stomatologııalyq baǵdarlama. Osy aralyqta sút tisteri turaqty tisterge aýysa bastaıdy, sol sebepti óńirimizdiń kishkentaı turǵyndary úshin osyndaı túsindirý jumystaryn júrgizý qajettiligi týyndap otyr.
- Aldyn ala tekserý tájirıbelerine sáıkes, 6 jastaǵy balalardyń 80% astamynda tis jegi aýrýy anyqtalady. Sondyqtan osy jastaǵy balalarǵa aýyz qýysynyń tazalyǵyn saqtaý asa mańyzdy, quramynda ftory bar tis pastalaryn, tis jipterin qoldanǵany durys, sondaı-aq, stomatolog dárigerge júıeli túrde qaralsa, artyq etpeıdi. Al ata-analar tarapy aýyz qýysynyń saýlyǵyna qamqorlyqty óz jaýapkershiligine alýǵa balalardy úıretkeni abzal. Baǵdarlamanyń maqsaty - balalar arasynda kezdesetin stomatologııalyq aýrýlardyń tómendeýine úles qosý, aýyz qýysyn durys tazalaýǵa balalardy úıretý, - deıdi Q.Mashyryqov.
Aldaǵy ýaqytta bilim berý ordalarynda bastapqy synyptarda tis aýrýynyń aldyn alý boıynsha sabaqtar ótkizý josparda bar. Al ata-analar tarapy bolsa óz balalarynyń erte kezden bastap aýyz qýysyn únemi tazalaý mańyzdylyǵy týraly úıde kúndelikti aıtyp otyrsa, artyq etpeıdi. О́z kezeginde densaýlyq saqshylary tis aýrýyn boldyrmaý joldaryn keńinen túsindirýge árdaıym daıyn ekendikterin jetkizdi.