Qytaıdan shyqqan koronavırýs aýrýy el ishinde úreımen qatar túrli áńgimelerdi de týdyrýda. Jambyl oblysynda da osy ýaqytqa deıin túrli áleýmettik jeliler arqyly Shý aýdany temirjoly mańynda arnaıy kıingen qyzmetkerlerdiń sýreti taraǵan bolatyn. Sonymen qatar jiberilgen habarlamalarda Úrimji qalasynan kelgen Sý Jan Hýı esimdi 1972 jyly týǵan azamattyń málimetteri jazylǵan edi. Sońynan Shý aýdanyna qytaılyq azamattardyń kelgeni, olardyń jedel respıratorlyq vırýstyq ınfeksııalar kúdigimen aýrýhanaǵa jatqyzylǵany rastaldy.
Qazir Jambyl oblysynyń Shý aýdanyna kelgen qytaı azamattary koronavırýsqa tekserilý ústinde. Abyroı bolǵanda sheteldik azamattar koronavırýsqa shaldyqty degen habar naqtylanǵan joq. Bul rette kópshiliktiń dúrligýi negizsiz. Atap aıtsaq, Shý qalasynyń temirjol beketinen 29 qańtar kúni tańǵy saǵat 05:45 shamasynda 103 nómirine vırýsty ınfeksııa juqtyrǵan bolýy múmkin degen adamdardyń bar ekendigi týraly habar túsken. Artynsha Jambyl oblystyq densaýlyq saqtaý basqarmasynyń qyzmetkerleri №86 «Saryaǵash-Nur-Sultan» baǵytyndaǵy poıyzdan qytaılyq eki azamatty túsirip alyp, Shý aýdandyq ortalyq aýrýhanasyna jetkizgen. Al Jambyl oblysy ákimdiginiń málimetinshe, olar aýdandyq aýrýhananyń juqpaly aýrýlar bólimshesinde medısınalyq baqylaýǵa alynyp, jedel respıratorlyq vırýstyq ınfeksııalary bar degen dıagnoz qoıylǵan. Qytaılyqtardyń jaǵdaılary búginde birqalypty. Olardyń dene qyzýynyń kóterilýi de baıqalmaǵan. Endi «Saryaǵash-Nur-Sultan» baǵytyndaǵy poıyzdyń sol vagonynda bolǵan bul jolaýshylar 14 kún boıy dárigerlerdiń baqylaýynda bolady. Búginde oblystyń medısınalyq ortalyqtary men Shý aýdanynyń medısınalyq uıymdary jeke qorǵaný qurylǵylarymen, dárilik preparattarmen, bir ret qoldanylatyn betperdelermen jáne zalalsyzdandyrý quraldarymen tolyq qamtamasyz etilgen.
Jambyl oblysy