Qytaıdaǵy epıdemıologııalyq jaǵdaıǵa baılanysty Qazaqstan Úkimeti koronavırýstyń el aýmaǵyna ári qaraı taralýyn boldyrmaý úshin 27 qańtardan bastap Almaty – Nur-Joly – Úrimshi, О́skemen – Maıqapshaǵaı – Úrimshi, Jarkent – Qorǵas – Qulja, Aıagóz – Baqty – Zımunaı baǵyttarynda avtobýs qatynasyn ýaqytsha toqtatý týraly sheshimge keldi. Bul eki baǵytta kúnine barlyǵy 14 reıs qatynaıtyn.
Sondaı-aq 1-3 aqpan aralyǵynda eki el arasyndaǵy temir jol jáne áýe qatynastary ýaqytsha toqtatylady. Osyǵan oraı aǵymdaǵy jylǵy 3 aqpannan bastap atalǵan reısterge bılet alǵandar ony satyp alǵan jerleri boıynsha qaıtara alady. Bıletter úshin aqsha aıyppulsyz rásimdelip, tolyq kólemde qaıtarylady. Saparynan qalyp qoıǵan jolaýshylardy elge qaıtarý úshin Beıjiń jáne Úrimshi qalalarynan qosymsha reıster uıymdastyrylatyn boldy.
«Nur-Sultan – Úrimji men Almaty – Úrimji baǵytyndaǵy poıyzdar Aqtoǵaı stansasynda bir poıyz bolyp birigip, ári qaraı Úrimjige baǵyt alatyn. Ol jaqqa bılet alǵandardyń kóbi Dostyq stansasynan túsip qalady. Anyqtaǵanymyzdaı, Dostyqtan ári qaraı Úrimjige deıin 22 bılet alynǵan eken. Osy 22 adamnyń ishinde 8-i bıletti qaıtarǵan. Qalǵan 14 adamǵa operatorlar habarlasyp, poıyzdyń júrmeıtinin, bılet qunyn alyp ketýi kerektigin aıtyp jatyr», – dedi bul jóninde QR IIDM Kólik komıtetiniń tóraǵasy Samat Ǵylymov. Al Azamattyq avıasııa komıtetiniń tóraǵasy Talǵat Lastaev áýe bıletteriniń de tolyq quny ıelerine qaıtarylatynyn aıtady. Jáne bıletterge eshqandaı komıssııa ustalmaıdy, tolyq kólemde qaıtarylady.