Keshe qyzylordalyqtardy tańerteńnen áleýmettik jelilerde «Oblystyq juqpaly aýrýlar aýrýhanasyna koronavırýs ınfeksııasyn juqtyrǵan adam jatqyzylypty» dep taraǵan jazba ábigerge salǵan edi. Jurtty dúrliktirgen jaǵdaıǵa baılanysty tústen keıin brıfıng ótkizgen mamandar máseleniń mán-jaıyn ashyp aıtty.
Oblystyq densaýlyq saqtaý basqarmasynyń basshysy Jaqsylyq Abdýsametov jáne taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Álııa Ábdiqaıymova osy jylǵy 28 qańtar kúni ystyǵy kóterilip, dárigerge qaralǵan bir azamattyń qazir oblystyq juqpaly aýrýlar aýrýhanasynda em alyp jatqanyn jetkizdi. Dárigerlerdi alańdatqany, onyń 11-18 qańtar aralyǵynda Qytaı elinde em alǵany bolyp shyqty. 20 qańtarda Qyzylordaǵa jetken jerlesimiz 8 kúnnen keıin aýrýhanaǵa túsken. Bir qýanarlyǵy, dárigerler kúdigi rastalmady. Qazir naýqastyń ystyǵy túsip, em alýdy jalǵastyrýda. Vırýsologııalyq zerthana mamandary da jerlesimizdiń qaýipti vırýsqa shaldyqpaǵanyn rastap otyr.
Qyzylorda oblysy