Nur Otan partııasy Tóraǵasynyń birinshi orynbasary Baýyrjan Baıbektiń Atyraý oblysyna jasaǵan jumys sapary oblys ortalyǵynda jalǵasyp, partııanyń oblystyq fılıaly men bastaýysh uıymdary ókilderimen, óńirdiń zııaly tulǵalarymen, qoǵamdyq pikir kóshbasshylarymen jáne oblystyń jastar uıymdarymen kezdesý ótkizdi, dep habarlady Nur Otan partııasynyń baspasóz qyzmeti.
B.Baıbek birinshi kezekte partııanyń Atyraý oblystyq aýrýhanasyndaǵy «Yntymaq» bastaýysh uıymy múshelerimen kezdesýden bastady. Partııa Tóraǵasynyń birinshi orynbasary kezdesýde partııa músheleriniń eleýli bóligin áleýmettik sala qyzmetkerleri quraıtynyn atap ótip, qarapaıym dárigerler men medısına qyzmetkerleriniń áleýmettik jaǵdaıyn jaqsartý, dárigerlerdiń eńbegin oryndy baǵalaý jaıyna egjeı-tegjeıli toqtaldy. «Biz dárigerler eńbegin, osy saladaǵy jasalyp jatqan jumystardy halyqqa túsindirýimiz qajet», dedi B.Baıbek.
Sonymen qatar memleketimiz tarapynan medısına salasynda atqarylyp jatqan aýqymdy ister men kórsetilip otyrǵan qomaqty qoldaý da tilge tıek etildi. Onyń aıtýynsha, Elbasy, Nur Otan partııasynyń Tóraǵasy Nursultan Nazarbaev partııanyń HVIII sezinde alǵashqy medısınalyq sanıtarlyq kómekti damytýǵa qosymsha 120 mlrd teńge bólýdi tapsyrǵan. О́tken jyly Memleket basshysy Qasym-Jomart Toqaev Qazaqstan halqyna Joldaýynda úsh jyldyq bıýdjet aıasynda densaýlyq salasynyń damýyna qosymsha 2,3 trln teńge qarjy bólinetinin aıtty. Sonyń nátıjesinde 2019 jyly densaýlyq saqtaý qyzmetkerleriniń eńbekaqysy ishinara 30%-ǵa kóterildi. Atyraý oblysy boıynsha 8 myńnan astam qyzmetkerdiń jalaqysy ósken. Al 2020 jyldyń qańtarynan bastap dárigerlerdiń jalaqylary orta eseppen 30%-ǵa ósti.
Dárigerler qaýymymen kezdesýde óńirdegi ózekti máseleler de nazardan tys qalmady. Solardyń qatarynda náresteler ólim-jitiminiń artýy da ataldy.
Kezdesýde dárigerler de tosylmaı, óz usynystary men oılaryn ortaǵa saldy. Solardyń qatarynda jas dárigerlerdi turǵyn úımen qamtamasyz etý, dárigerlerge pedagogtar sekildi erekshe mártebe berý jaıyn qarastyrý jaıy sóz boldy.
Saparyn ári qaraı jalǵastyrǵan Baýyrjan Baıbek óńirdiń zııalylaryna arnaıy at basyn burdy. Eldiń sóz ustar tulǵalarymen bolǵan bul kezdesýde óńir rýhanııatyna, mádenıetine, din men tilge qatysty ózekti máseleler qozǵalyp, jan-jaqty talqylandy. О́z sózinde B.Baıbek partııanyń maqsaty men mindetterine, mádenıetti, ulttyq qundylyqtardy dáripteý baǵytynda qolǵa alǵan sharalaryna keńinen toqtaldy.
«Bizdiń partııanyń birinshi mindeti – halyqtyń muńyn muńdap, sózin aıtyp, halyqtyń pikirin bılikke jetkizý. Bılik tarapynan kóp nárse jasalyp jatyr. Biraq keıbir kezde bul jasalǵan jumystar halyqqa durys nasıhattala bermeıdi. Sondyqtan barlyq múmkindikterdi paıdalana otyryp, atqaryp jatqan jumystardy halyqqa qarapaıym tilmen jetkizý kerek. Ol – partııanyń ekinshi mindeti. Úshinshi mindeti, árıne biz naqty isterdiń partııasymyz. Sondyqtan biz negizsiz nárselerdi eshqashan kótermeımiz. Qazirgi kezde ákimdermen birlesip árbir óńirde partııanyń baǵdarlamasyn talqylap jatyrmyz», dedi Baýyrjan Baıbek.
О́z kezeginde óńirdiń zııalylary partııa Tóraǵasynyń birinshi orynbasaryna tolǵandyryp júrgen saýaldaryn qoıyp, óz oılaryn búkpesiz ortaǵa saldy.
Basqosýda munaı salasynyń ardageri Maqsym Izbasov jergilikti munaıshylardyń jalaqysyn sheteldiktermen teńestirý, óńirdegi ekologııa máselesin ońaltý, Jaıyq ózeni deńgeıiniń jyldan-jylǵa azaıý máselelerin ortaǵa saldy. Al H.Dosmuhamedov atyndaǵy Atyraý memlekettik ýnıversıtetiniń ǵylymı keńesiniń hatshysy, partııa ardageri B.Tynybaeva Atyraý oblysyndaǵy apatty jáne úsh aýysymdy mektepter, balabaqshanyń jetispeýshiligi máselelerin tilge tıek etti.
О́ńir zııalylarynyń pikirlerin den qoıa tyńdaǵan Baýyrjan Baıbek otandyq munaıshylar jalaqysyndaǵy teńsizdikterge baılanysty el Prezıdenti Qasym-Jomart Toqaevtyń sheteldik jumys berýshiler tarapynan bizdiń azamattarymyzdy kemsitýge jol bermeý týraly másele kótergenin, sol sııaqty qorshaǵan ortany saqtaý máselesinde de Memleket basshysynyń shıkizat energııa sektorynyń jumysynda ekologııaǵa zııandy boldyrmaý kerektigin tapsyrǵanyn aıtty.
Bilim, urpaq tárbıesi partııanyń erekshe nazar aýdaratyn salalary ekendigine toqtalǵan partııa Tóraǵasynyń birinshi orynbasary oblystaǵy úsh aýysymdy jáne apattyq mektepterdi joıý úshin bes jylǵa arnalǵan Is-sharalar jospary ázirlengenin, aıtylǵan eki usynys ta jaqyn aradaǵy besjyldyqta óz sheshimderin tabatynyn jetkizdi.
О́ńirdiń qoǵamdyq pikir kóshbasshylarymen, blogerlermen jáne BAQ ókilderimen kezdesýde Baýyrjan Baıbek qazirgi tańda jańa syn-qaterlerdi eskere otyryp, kommýnıkasııalardyń zamanaýı tehnologııalaryn paıdalaný arqyly halyqpen dıalog ornatýdyń mańyzdylyǵyna, partııa tarapynan alǵash qolǵa alynǵaly otyrǵan praımerız ótkizý tártibine toqtaldy.
Nur Otan partııasy Tóraǵasynyń birinshi orynbasary Atyraý jastarymen de kezdesti.
«Qazirgi kezde «Jastar – Otanǵa» baǵdarlamasyn ázirleý qarastyrylýda. Biz muny ár aýdanda talqylap, usynystar jınaqtap jatyrmyz», dedi Baýyrjan Baıbek.
Atyraý óńirine jasalǵan eki kúndik sapardyń sońyna qaraı Nur Otan partııasy Tóraǵasynyń birinshi orynbasary B.Baıbektiń qatysýymen Atyraý oblystyq fılıalynyń kezekten tys konferensııasy ótti. Konferensııada partııa Lıderi Nursultan Nazarbaevtyń kelisimimen Nur Otan partııasynyń Atyraý oblystyq fılıalyna osy oblystyń jýyrda taǵaıyndalǵan jańa ákimi Mahambet Dosmuhambetov tóraǵa bolyp saılandy.