2020 jyldyń 1 aqpanynan bastap Eýrazııa birinshi arnasynda «Senat Online» jańa televızııalyq baǵdarlamasy jaryqqa shyǵady. Bul týraly Parlament palatasynyń baspasóz qyzmeti habarlady.
Joba ıdeıasy – Parlament Senatynyń qyzmeti týraly habardar etý, qazaqstandyqtardy tolǵandyratyn máseleler boıynsha senatorlardyń azamattyq ustanymyn kórsetý bolyp tabylady.
Senat Online Parlamenttiń joǵarǵy Palatasynyń jumys aptasynyń qorytyndysyn shyǵarady. Jýrnalıster komıtetterde nemese Senat otyrysyndaǵy asa mańyzdy zań jobalarynyń talqysy týraly baıandaıdy. Telekórermender saılaýshylarmen kezdesý, depýtattardyń halyqaralyq deńgeıdegi jumysy týraly reportajdardy kóre alady.
Telehabar tek jedel aqparatpen ǵana shektelmeıdi. Zań jobalary men depýtattyq saýaldardyń taǵdyryn qadaǵalaý, senatorlar kótergen problemalyq máselelerdi damytý jáne sheshý de josparlanyp otyr.
Senat Online telehabar ár apta saıyn senbi kúni saǵat 20.30-da shyǵatyn bolady.