Darıǵa Nazarbaevanyń tóraǵalyq etýimen Qazaqstan Respýblıkasy Parlamenti Senatynyń otyrysy boldy. Bul týraly Parlament Senatynyń baspasóz qyzmeti habarlady.
Senat depýtattary otyrysta Salyqtyq bazany búrkemeleýge jáne paıdany salyq salý aıasynan alyp ketýge qarsy is-qımyl jasaý maqsatynda salyqtyq kelisimderge qatysty sharalardy oryndaý jónindegi kópjaqty konvensııany ratıfıkasııalady. Zań jobasyn Premer-Mınıstrdiń birinshi orynbasary – qarjy mınıstri Álıhan Smaıylov tanystyrdy.
Qosymsha baıandama jasaǵan senator Ǵumar Dúısembaev konvensııa elderge ulttyq fıskaldyq saıasatty júrgizýde ıkemdi bolý úshin kelisilgen eń az standarttardy belgili bir eskertpelermen qoldaný arqyly qazirgi halyqaralyq salyqtyq kelisimderge BEPS bastamasynyń negizgi erejelerin engizýdi kózdeıtinin atap ótti.
Joǵarǵy Palatanyń jalpy otyrysynda senatorlar Shanhaı yntymaqtastyq uıymynyń ekstremızmge qarsy is-qımyl jónindegi konvensııasyn da ratıfıkasııalady.
Elimizdiń Ulttyq qaýipsizdik komıteti tóraǵasynyń orynbasary Nurǵalı Bilisbekov qujatty tanystyra kelip, onyń mindeti ShYU-ǵa múshe memleketterdiń aldyn alý qyzmeti, ekstremızmge birlesken qarsy is-qımyl, quqyqtyq kómek kórsetý, sondaı-aq taraptar zańnamasyn birdeıleýge yqpal etý salasyndaǵy ózara is-qımyl tetikterin bekitý ekenin atap ótti.
«Údep bara jatqan terrorıstik qaýip-qaterdiń ǵana emes, kez-kelgen memlekettik tóńkeristiń aldyn alý turǵysynda zańdy bılikke zorlyq áreket júrgizýge qarsy is-qımyl jasaýǵa jol bermeıtin quqyqtyq negizder – qarastyrylyp otyrǵan qujattyń jańalyǵy bolyp tabylady», dedi Nurjan Nursıpatov.
Senatta sondaı-aq Tunshyqtyratyn, ýly nemese basqa da uqsas gazdar men bakterıologııalyq quraldardy soǵysta qoldanýǵa tyıym salý týraly hattama da ratıfıkasııalandy.
Osy zań jobasyn tanystyrǵan bilim jáne ǵylym mınıstri Ashat Aımaǵambetov qujattyń maqsaty soǵysta tunshyqtyratyn, ýly nemese basqa da uqsas gazdardy, sondaı-aq kez kelgen sol tektes suıyqtyqtardy, zattar men prosesterdi, sondaı-aq soǵys kezinde bakterıologııalyq quraldardy qoldanýǵa tyıym salýdy bekitý ekenin habarlady.
Senat otyrysy barysynda 14 depýtattyq saýal jarııa etildi. Depýtattar ınfraqurylymdyq jobalardy qarjylandyrý máselelerine basa nazar aýdardy.
Senat basshysy óz sózinde ınfraqurylymdy jańǵyrtý máseleleri búgingi tańda halyqtyń ál-aýqatyn ósirýdi qamtamasyz etý turǵysynda asa mańyzdy ekenin atap ótti.
«Kónergen ınfraqurylym: sý, kommýnıkasııa, elektr jelileri, joldar, kópirler – asa mańyzdy máselelerdiń biri bolyp otyr. Úkimetke ınfraqurylymdy jańǵyrtý problemalaryn qaraýdy ári ony jumystyń basty máselesi etýdi usyný qajet bolyp otyr. Infraqurylym nysandary jaǵdaıynyń nasharlyǵyna baılanysty biz sýdy, elektr qýatyn jáne basqa da resýrstardy joǵalta bastadyq. О́ńirler arasyndaǵy baılanys álsiz damýda, óıtkeni tıisti ınfraqurylym jetispeıdi. Depýtattar osy máselemen tyǵyz aınalysý kerek dep oılaımyn», dedi D.Nazarbaeva.