Bul kúnderi О́zbekstannyń bas shahary – Tashkentte aýyr atletıkadan Tokıo Olımpıadasyna joldama berýshi lısenzııalyq týrnır ótip jatyr. Jarystyń alǵashqy kúni qazaqstandyq sportshylar úshin sátti bastaldy.
Týrnırdiń alǵashqy kúni jarys jolyna shyqqan 61 kılodaǵy otandasymyz Igor Son qos saıys qorytyndysy boıynsha 286 kılony (130+156) eńserip, tuǵyrdyń bıik satysynan kórindi. Al malaızııalyq Mohamed Anzıl Bın Bıdın (283 kg) ekinshi, túrikmenstandyq Seıitjan Mırzaev (280 kg) úshinshi oryn ıelendi. Aıta keteıik, Igor Son ótken jyldyń jeltoqsan aıynda Dohada (Qatar) ótken lısenzııalyq týrnırde 278 kılo ziltemirdi kóterip, jeńimpaz atanǵan bolatyn.
Tashkenttegi dodaǵa Igor Sonnan bólek, taǵy úsh atletimiz qatysyp jatyr. Aldaǵy ýaqytta jarys jolyna 102 kılo salmaqta Ilıa Ilın, 109 kılo salmaqta Ibragım Bersanov kúsh synasady. Al áıelder arasyndaǵy 81 kılo salmaq dárejesinde Raýshan Meshithanova jarys kórigin qyzdyrady.