Jambyl oblysy Qordaı aýdanynda bolǵan keshegi jaıt ózekti órteıdi. Sol keleńsizdikte qaza bolǵan jandardyń otbasyna qaıǵyryp kóńil aıtamyn. Men barlyq qazaqstandyqty sabyrly bolýǵa shaqyramyn.
Memleket basshysy Qasym-Jomart Toqaevtyń málimdeme jasaǵany belgili. Bul oqıǵaǵa qatysty kináli tulǵalar anyqtalyp, zańǵa sáıkes óz jazalaryn alatyn bolady. Arnaıy qurylǵan komıssııa bul jaǵdaıdy tolyq baqylaýda ustap otyr. Elimizdiń basty baılyǵy ulttar birligi ekenin umytpaıyq! Elbasynyń beıbitshilik pen tatýlyqty tý etken saıasatynyń arqasynda beıbit ómir súrip jatyrmyz. El birliginiń saqtalýyna, dáriptelýine Qazaqstan halqy Assambleıasynyń da qosyp jatqan úlesi bar. Osy sekildi oqıǵalardy týdyratyn arandatýshylarǵa jol bermeýimiz kerek. Elimizdiń aırandaı uıyǵan aýyzbirshiligin buzýǵa múmkindik týǵyzbaýymyz qajet.
Osy jaǵdaıdy eskere otyryp, qaıta oryn almaýynyń barlyq amaldaryn jasaýǵa tıispiz. Birligimizdi, beıbitshiligimizdi buzýshylardyń, el ishine iritki salýshylardyń aram pıǵylyn kesip otyrǵan abzal. Táýelsiz Qazaqstan shańyraǵynyń astynda qazaq, ózbek, orys sekildi júzden asa ult-ulys baıandy ǵumyr keship keledi. Ol – bizdiń birligimizdiń, yntymaǵymyzdyń arqasy! Sol sebepti arandatýǵa ermeı, barynsha sabyrly bola bileıik!
Gennadıı Shıpovskıh,
Parlament Májilisiniń depýtaty