Muǵalimderdi qaǵazbasty jumysqa salǵandarǵa aıyppul salynady. Bul týraly Bilim jáne ǵylym mınıstri Ashat Aımaǵambetov «Qazaqstan» telearnasyndaǵy «Ashyq alań» baǵdarlamasynda aıtty.
«Pedagog mártebesi týraly» zańda tıisti normalar bar. Birinshiden, 20-120 AEK aralyǵynda aıyppul salý qarastyrylǵan. Ekinshiden, biz alǵash ret muǵalimder qandaı qujattardy toltyrý kerek degen suraqqa jaýap berdik», - dedi mınıstr.
Onyń aıtýynsha, Qazaqstan ýnıtarly memleket bolǵanymen, bir zańǵa baǵynǵanymen, óńirlerdegi jaǵdaı nazar aýdarýdy qajet etedi.
«Bir oblysty tekserdik. Onda muǵalimge 130 qujat teksertý mindettelgen eken. Eń qynjyltatyny - ustazdar sol qujattardy, qanshama esepterdi toltyrady, biraq bul qujat, esepter eshkimge kerek emes», - dedi A.Aımaǵambetov.
Sondaı-aq mınıstr endigide muǵalimder naqty bes qujat qana toltyratynyn aıtty.
«Qazirgi ýaqytta biz tıisti tizimdi daıyndadyq. Sol tizim boıynsha pán muǵalimi naqty bes qujat qana toltyrady», - dedi ol.