Qazaqstan Respýblıkasy Prezıdentiniń latyn negizdi qazaq tili álipbıin jetildirýge qatysty tapsyrmasyna jáne eks-Premer-Mınıstrdiń orynbasary Berdibek Saparbaev bekitken «Qazaq tiliniń latyn grafıkasy negizindegi álipbıin jetildirý boıynsha 2020-2025 jyldarǵa arnalǵan is-sharalar josparyna» sáıkes Qazaqstan Respýblıkasy Mádenıet jáne sport mınıstrligi óńirlerde joǵary jáne arnaýly oqý oryndarynyń fılolog ǵalymdary men oqytýshylarynyń arasynda aǵymdaǵy jyly 14 aqpanda ashyq talqylaý ótkizý týraly usynys bergen bolatyn.
Osyǵan oraı búgin Nur-Sultan qalasy ákimdigi, Tilderdi damytý jáne arhıv isi basqarmasynyń uıymdastyrýymen qazaq álipbıine qatysty ashyq talqylaý ótti. Onda latyn grafıkasyndaǵy qazaq álipbıiniń ózgertilgen nusqasy talqylandy. Jıynǵa L. Gýmılev atyndaǵy Eýrazııa ulttyq ýnıversıtetiniń, Eýrazııa gýmanıtarlyq ınstıtýtynyń, M.S. Nárikbaev atyndaǵy qazaq gýmanıtarlyq zań ýnıversıtetiniń, Kólik jáne kommýnıkasııa kolledjiniń, Gýmanıtarlyq kolledjdiń ǵalymdary men bilikti mamandary, mektep muǵalimderi, balabaqsha tárbıeshileri qatysty.
Qalada ótkizilgen ashyq talqylaýdyń qorytyndysy Qazaq álipbıin latyn grafıkasyna kóshirý jónindegi ulttyq komıssııa janynan qurylǵan jumys toptarynyń keńeıtilgen otyrysyna usynylady.