О́zbekstannyń astanasy – Tashkentte aýyr atletıkadan ótip jatqan jastar men jasóspirimder arasynda Azııa birinshiliginde Qazaqstan quramasy kezekti júldesine qol jetkizdi.
Bul joly 67 kıloda synǵa túsken Saıhan Taısýev bas júldeni oljalady. Qossaıystyń qorytyndysy boıynsha 299 (130+169) kılony eńsergen ol qarsylas shaq keltirmedi.
Esterińizge sala keteıik, buǵan deıin de otandastarymyz birneshe márte jeńis tuǵyryna kóterilgen edi. Atap aıtsaq, 55 kılo salmaqta óner kórsetetin Abylaı Áýelhanov qossaıystyń qorytyndysy boıynsha 227 (97+130) kılolyq ziltemirdi eńserip, jasóspirimder arasynda ekinshi jáne jastar arasynda úshinshi oryndy ıelendi.
64 kılo salmaqta baq synaǵan Gúlnur Ybyraı jasóspirimder saıysynda altynnan alqa taǵynsa, jastar arasynda kúmis medaldi moınyna taqty. Qazaq qyzynyń kórsetkishi – 198 (88+110) kılo.
61 kılo salmaq dárejesinde kúsh synasqan Aqmolda Saıramkez 267 (117+150) kılolyq nátıjemen jastar arasyndaǵy jarysty qola medalmen qorytyndylady.