Eń jaqsy áýen kúbiniń piskeni ǵoı.
О́skemendegi Sársen Amanjolov atyndaǵy Shyǵys Qazaqstan memlekettik ýnıversıtetinde satırık, "Ara" jýrnalynyń bas redaktory Kópen Ámirbektiń 70 jasqa tolýyna oraı «Kópen aǵa kele jatyr..» atty kezdesý ótti.
Kezdesýdi oqý ornynyń rektory Muhtar Tólegen ashyp: «Jastar sizdi uzaq kútti. Ýnıversıtetimizde osyndaı keshter jıi ótip turady. Shyǵysqa qosh keldińiz» deı kele satırıktiń ıyǵyna shapan jaýyp, qurmet kórsetti.
«Bıylǵy 70 jyldyǵymnyń Abaı elinen, Shyǵystan bastaý alǵanyna qýanyp otyrmyn» degen Kópen Ámirbek kezdesý barysynda balalyq, stýdenttik shaqtary, ustazdary, zamandastary týraly áserli áńgimeler aıtty. Bul kisiniń Kópen degen atynyń qoıylýynyń ózi bir tarıh eken.
«Kópen degen at óte sırek. О́skemende Kópen degen bir aqyn bar. Nursultan Nazarbaev osydan 15 jyl buryn Kópen degen polkovnıkke general ataǵyn berdi. Qaı jaqtan ekenin bilmeımin, teledıdardan kórip: «Oıpyrmaı, Kópen degen ekeý edik, generalmen úsheý boldyq» degenim esimde. Kópen esiminiń shyǵý mánisi mynada. Sheshem 10 bala tapqan. Altyn qursaq ana. Úsh qyz, jeti ul. Tula boıy tuńǵyshy menmin. Áke-sheshem qoıshy bolǵan. Syrdyń jaǵasynda, qamystyń arasynda óskenbiz. Kıiz úıde turdyq. Kóbine ústimizdegi kıimmen jata salatynbyz. Mektep bitirip, Almatyǵa kelip, stýdent atanǵanda prostynıa degenniń ne ekenin birinshi ret kórdim. 17 jasymda. Sheshem kıiz úıdiń syrtynda kúbi pisip turady. Eń jaqsy áýen kúbiniń piskeni ǵoı. Kúbiniń piskeni kúıdiń basy sekildi. Keshke taman otar qoı keledi. Qozylar jamyrap, biri mańyrap, biri ańyrap jatady. Orkestr sekildi. Biz osyndaı dalada óstik. Rasýl Ǵamzatovtyń bir sózi eske túsedi. «Dúnıedegi eń jaqsy áýen qandaı?» deıdi. «Qyzdyń kúlkisi». «Joq». «Qońyraýdyń syńǵyry». «Joq». «Attyń dúbiri». «Joq». «Bulbuldyń úni». «Joq». «Sonda siz úshin qandaı áýen jaqsy?» degende: «Men úshin eń keremet áýen meniń Hazar (Kaspıı) teńizimniń tolqyndarynyń bir-birine soǵylyp, shýlaǵan tolqyndarynyń úni. Jańaǵy aıtylǵan áýenderdiń barlyǵy sonyń ishine kirip tur» depti jaryqtyq. Sol sekildi óz basym maldyń ańyraǵanynan, qozynyń jamyraǵanynan artyq áýen kórmedim. Atymdy Kópen dep ájem qoıǵan. 9 jasymda qaıtqan eken ol kisi. Kópen degen attyń ne maǵyna beretinin elýge taıaǵanda taptym. Kitaptan. Kópen degen shóp bar eken. Sóıtsem, baıaǵy zamanda babalarymyz shalǵy oraqpen shóp shapqanda bir qatardy Kópen dep ataǵan eken. 10 kópendi jınaǵanda 1 kópene, 10 kópeneni jınaǵanda 1 shómele, 10 shómele 1 maıa bolady eken» dedi satırık.
О́SKEMEN