Sońǵy ýaqytta aıshyqty óneri jáne tolǵaı tabysymen jankúıerlerdi qýantyp júrgen qazaqstandyq tennısshi Elena Rybakına Katardyń astanasy – Dohada ótip jatqan týrnırdi merziminen buryn aıaqtaýǵa májbúr boldy.
Aıtýly jarystyń alǵashqy aınalymda jerlesimiz rýmynııalyq Sorana Kyrstıany úsh settik saıysta ol 3:6, 6:3, 6:1 esebimen utty. Kelesi kezeńde belgııalyq Alıson van Eıtvanktan basym tústi – 5:7, 6:2, 7:6. Úshinshi aınalymda Elenanyń joly álemniń birinshi raketkasy, aýstralııalyq Eshlı Bartımen qıysýǵa tıis edi.
Jankúıerler bul básekeni taǵatsyzdana kútti. Sebebi, dál osy tennısshi bıyl ótken Aýstralııanyń ashyq birinshiliginiń úshinshi aınalymynda jerlesimizdi jarys jolynan shyǵaryp tastaǵan bolatyn. Melbýrnde ketken eseni Rybakına Dohada qaıtaratyn shyǵar dep úmittendi. Biraq qazaqstandyq oıynshy jaraqatyna baılanysty týrnırdi ary qaraı jalǵastyrýdan bas tartty.