Qazaqstan Respýblıkasy Indýstrııa jáne ınfraqurylymdyq damý mınıstrligi «Qazaqstandaǵy taý-ken isi: roýd-shoý 2020» sharasy aıasynda 2020 jylǵy 27 aqpanda Londonda áleýetti ınvestorlarǵa elimizdiń taý-ken salasynyń ınvestısııalyq múmkindikterin tanystyrdy. Bul týraly Indýstrııa jáne ınfraqurylymdyq damý mınıstrliginiń baspasóz qyzmeti habarlady.
Is-shara Qazaqstan Respýblıkasynyń Ulybrıtanııadaǵy elshiliginiń qoldaýymen Brıtanııanyń «British Expertise International» tanymal saýda uıymy alańynda uıymdastyrylyp, elimizdiń perspektıvalyq ınvestısııalyq jobalary boıynsha brıtandyq kompanııalarmen ózara tıimdi yntymaqtastyqty damytýǵa arnaldy.
Is-sharada áleýetti ınvestorlarǵa Qazaqstannyń jer qoınaýyn paıdalaný salasyndaǵy sońǵy úrdister, zańnamalyq reforma jáne ınvestısııalyq múmkindikter jóninde málimetter usynyldy. Jınalǵandarǵa Qazaqstannyń Ulybrıtanııadaǵy Elshisi Erlan Ydyrysov, Qazaqstan Respýblıkasynyń Indýstrııa jáne ınfraqurylymdyq damý vıse-mınıstri Rýslan Baımıshev, «Taý-Ken Samuryq «UK» AQ tóraǵasy Qanat Qudaıbergen jáne Qazaqstan bıznes-qaýymdastyǵy ókilderi sóz sóıledi. Baıandamashylar qazaqstandyq naryqtyń keleshegi, ınvestorlar úshin jańa múmkindikter, taý-ken salasyndaǵy ózgerister men ınnovasııalar, sondaı-aq Qazaqstannyń geologııalyq barlaýda ınnovasııalyq tehnologııalardy engizý jetistikteri týraly aıtyp berdi.
Rýslan Baımıshev mınıstrliktiń taý-ken salasynyń ınvestısııalyq ahýalyn jaqsartýǵa baǵyttalǵan negizgi bastamalary, sondaı-aq, «Jer qoınaýy jáne jer qoınaýyn paıdalaný týraly» Kodekstiń negizgi jańalyqtary týraly baıandap berdi.
2018 jyly «Jer qoınaýy jáne jer qoınaýyn paıdalaný týraly» Qazaqstan Respýblıkasynyń jańa Kodeksi kúshine endi. Birinshi ótinim qaǵıdaty, CRIRSCO qorlaryn esepteýdiń halyqaralyq júıesi engizildi. Geologııalyq aqparatqa ashyq qol jetkizý qamtamasyz etildi. Memlekettik retteýdiń aıqyn jáne ashyq tetikteri qabyldandy. Qazaqstan jer qoınaýyn paıdalanýdyń ınvestısııalyq tartymdylyǵy boıynsha júrgizilgen jumys nátıjeleri boıynsha Freızer ınstıtýtynyń reıtıngisinde 73-orynnan 24-orynǵa (49 pozısııaǵa) kóterildi. Dúnıejúzilik Banktiń Doing Business reıtıngisinde Qazaqstan álemniń 190 eliniń arasynda 25-orynda. Sektorda Rio Tinto, Glencore, Illuka, Polymetal jáne t.b. sııaqty álemdik brendter tabysty jumys isteýde» dedi Rýslan Baımıshev.
Ulybrıtanııa halyqaralyq saýda mınıstrliginiń ókili Roland hanym: «Meniń oıymsha, Qazaqstan halyqaralyq ınvestorlar úshin barynsha tartymdy elge aınalýda. Taý-ken sektoryndaǵy jańa kodeks, taıaý arada qabyldanady dep otyrǵan jańa ekologııalyq kodeks, CRIRSCO standarttary men óndirýshi salalardyń ashyqtyǵy bastamasynyń qoldanylýy Qazaqstandy bıznes júrgizý úshin tartymdy memleket etedi».
Brıtandyq kompanııalar Qazaqstanda júrgizilip jatqan reformalardy oń qabyldap, geologııalyq jáne taý-ken salasyndaǵy yntymaqtastyqty keńeıtýge jáne tereńdetýge múddelilik tanytyp, saladaǵy qazaqstandyq áleýetti tolyq júzege asyrýǵa qatysýǵa daıyn ekenderin jetkizdi.