Qazaqtyń uly aqyny Abaı Qunanbaıulynyń 175 jyldyǵyna oraı Taraz qalasyndaǵy «Balasaǵun» ortalyq konsert zalynda «Jelsiz túnde jaryq aı» atty kompozısııalyq kesh ótti.
Kórermendi kórkem keńistikke tartqan konsert-kompozısııany Asqar Toqpanov atyndaǵy Jambyl oblystyq qazaq drama teatrynyń shyǵarmashylyq ujymy men Kenen Ázirbaev atyndaǵy oblystyq fılarmonııanyń ónerpazdary sheber úılestirdi. Sonymen qatar shara aıasynda «Ejelgi Taraz eskertkishteri» memlekettik tarıhı-mádenı qoryq-mýzeıiniń qyzmetkerleri «Abaı murasy – halyq ulaǵaty» atty jyljymaly kórmeni kelýshiler nazaryna usyndy.
Hakim shyǵarmalaryna arnalǵan keshke kelgen kópshilik áýeli LED ekran arqyly «Tarıh. Taǵdyr. Tulǵa» atty derekti fılmdi tamashalady. Munda Abaıdyń ómiri men shyǵarmashylyǵyna qatysty derekter aıtylyp, abaıtanýshy ǵalymdar óz pikirlerimen bólisti. Al «Jelsiz túnde jaryq aı» atty konsert-kompozısııa Adaı Jumat dırıjerlik etken qazaq ult-aspaptar orkestriniń oryndaýyndaǵy Abaıdyń «Torjorǵa» kúıimen ashyldy. Budan keıin «Mereı» toby aqynnyń «Jelsiz túnde jaryq aı» ánin naqyshyna keltire oryndasa, «Sholpy» bı ansambli ánniń ajaryn ashyp, sahnanyń sánin keltirdi. Sonymen qatar oblystyq qazaq drama teatrynyń ártisteri aqynnyń «О́leń – sózdiń patshasy, sóz sarasy» óleńin oqysa, orys, káris, dúngen ultynyń ókilderi Abaı shyǵarmalaryn oryndady. Al, qazaq ult-aspaptar orkestriniń súıemeldeýimen hakimniń áıgili «Kózimniń qarasy» ánin oryndaǵan Mádenıet salasynyń úzdigi Janatbek Kádirov kóptiń yqylasyna bólendi.
Abaı óleńderi tutas ulttyń rýhanı qaınar kózi. Aqyn óleńderinde muń men syr, qasıet pen qasiret qatar óriledi. Bul rette teatr ártisteri Abaıdyń «Jigitter, oıyn arzan, kúlki qymbat», «Qajymas dos halyqta joq», «Segiz aıaq» týyndylarynan kórkem kompozısııa oryndady. Munda hakim shyǵarmashylyǵynyń tutas álemi jasalyp, aqyn basyndaǵy oı beıneti, sezim sharpylystary keremet kórinis tapty. Mádenıet salasynyń úzdigi Aıgúl Maqasheva men Sulýjan Ábenova «Segiz aıaq» ánin shyrqasa, Abaı men Toǵjan, Abaı men Áıgerim arasyndaǵy mahabbat dastany týraly poetıkalyq qoıylym kórermendi beı-jaı qaldyrmady.
Bul keshte Abaı operasynan «Ajardyń arııasy», Aleksandr Pýshkınnen aýdarǵan «E.Onegınniń Tatıanaǵa jazǵan haty» shyǵarmalary da oryndaldy. Sonymen qatar aqynnyń «О́lsem ornym qara jer, syz bolmaı ma?», «Esińde bar ma, jas kúniń?» atty fılosofııalyq óleńderi oqyldy. Kópshilikke oı salarlyq, ǵıbrat alarlyq shara sońynda óńir ónerpazdaryna Jambyl oblysynyń ákimi Berdibek Saparbaevtyń yqylas gúli saltanatty túrde tabys etildi.
Jambyl oblysy