Halyqaralyq áıelder merekesi qarsańynda «Azamattarǵa arnalǵan úkimet» memlekettik korporasııasy» kommersııalyq emes aksıonerlik qoǵamynyń Almaty qalasy boıynsha fılıalynda tabysty eńbek ete júrip, el demografııasyna zor úles qosyp júrgen kóp balaly analar men halyqqa qyzmet kórsetýde tabysqa jetip júrgen qyzmetkerlerge qurmet kórsetildi.
Fılıaldyń kásipodaq komıteti tarapynan kóp balaly analarǵa syılyqtar men alǵys hattar ázirlense, úzdik qyzmetker-qyzdar «Kásipodaq qyzmetiniń damýyna qosqan úlesi úshin» tósbelgisimen jáne Qurmet gramotalarymen marapattaldy.
«Men 2008 jyldan beri osy salada eńbek etip kelemin. Sodan beri ujymym – meniń ekinshi úıime aınaldy. Balalarym da men qyzmet etetin oryndy jaqsy biledi. Sebebi, fılıal bizdiń balalarymyzǵa da únemi merekeler jasap, túrli baıqaýlar uıymdastyryp, syılyqtar berip turady. Mereke qarsańynda bizge de qurmet kórsetip jatyr. Ujymnyń kásipodaq uıymyna alǵysymyz sheksiz», – deıdi bes balanyń anasy, mamandandyrylǵan HQO qyzmetkeri Qarlyǵash Erǵaraeva.
Osylaısha, mereke qarsańynda fılıalda eńbek etetin 50-den asa kóp balaly ana men 20-ǵa jýyq úzdik qyzmetker marapattaldy.
Fılıal dırektory Danııar Qyryqbaev halyqqa minsiz qyzmet kórsetip, eleýli eńbek ete júrip elimizdiń demografııasyna úles qosyp júrgen arý analarǵa alǵysyn bildirdi.
ALMATY