Uly Jeńiske – 75 jyl. Aqmola oblysynan qan maıdanǵa 83142 azamat attanǵan, sonyń teń jartysy eline oralmady. Búgingi kúni kózi tiri 38 soǵys ardageri bar.
Maıdan dalasynda oq-dáriniń ıisin ıiskemese de, tyldaǵy taqsyretti tartqandar az emes. Sonyń biri Valentına Vılhovchenko. Soǵys bastalǵan kezde nebári 7 jasar búldirshin bolatyn. Tiri qalý úshin sol kezden bastap tyrbanyp tirshilik etti.
Ákesi maıdanǵa attanǵanda 7 jasar Valentına anasymen jáne eki baýyrymen qaldy. Týǵan jeri Ýkraınanyń Dnepropetrovsk qalasyna jaý jaqyndap kelgende qanshama qıynshylyqty basynan keshirdi. Ashtyqty da kórdi, basqynshy jaýdan bas saýǵalap 200 shaqyrym jerdi jaıaý júrgeni este. Aqyry ata-anasynyń týǵan jeri Iаsınovatka selosyna qonys aýdaryp, 7 jyl sonda turaqtady.
– Eske alý óte qıyn. Qaýip tóngen kez edi. Kez-kelgen mınýtta jaý qolynan ólip ketýimiz múmkin edi. Soǵys aıaqtalǵansha kolhozda turdyq. Barlyq jumys áıel adamdar men balalardyń moınynda boldy. 7-8 jasar bala bolsaq ta, kúni-túni jumys istedik. Astyq jınaıtyn tehnıkaǵa eki-eki baladan jarmasyp, sony aınaldyratynbyz, – deıdi tyl ardageri.
Aýyr jumys kezinde talaı ólim aýzynan qalypty. Tyń ıgerý jyldarynda jastar jappaı Qazaqstanǵa kelip jatty. Valentına Ivanovna da 1961 jyly kóshpen birge Selınograd qalasyna qonys aýdarǵan. Osy jerde ómirlik jaryn kezdestirip, otbasyn qurady. Araǵa on jyl salyp, otaǵasyn qyzmet babymen Kókshetaý oblysyna aýystyrady. Tyl ardageri sol kezde qalalyq aýrýhanaǵa dáriger bolyp ornalasady. Osy jerden zeınetke shyǵady. Ul men qyz tárbıelep ósirdi. Uly ana jolyn qýyp dáriger bolyp eńbek etýde.
Valentına Ivanovna semserlesý sport túri boıynsha KSRO-nyń sport sheberi. Dnepropetrovskide medısınalyq ınstıtýtta oqyp júrip-aq, semserlesý arqyly tanylyp, talaı jarystarda chempıon atanǵan eken. Keıin mamandyǵy boıynsha semserlesýshi sportshylarǵa dárigerlik kómek kórsetýmen aınalysqan. Búginde ardager ótkenin jylýlyqpen eske alyp, bolashaǵyna esh alańsyz qaraıdy.
Uly Jeńis merekesi qarsańynda tyl ardageri tolǵanatyn shaq kóp. О́tken ómir oıǵa oralady. Tirshiliginiń tinin uzartqan eńbek dep topshylaıdy. Jas tolqynmen júzdesken sátte adaldan tapqan nan tátti ekendigin aıtýdan jalyqqan emes.