Túrkistan qalasynan 15 shaqyrym jerde ornalasqan Orańǵaı aýylynda turatyn Ánjir Qojamberdıeva dúnıege 16 perzent ákelgen. Batyr ananyń 11 qyz, 5 uly búginde ósip-óngen ónegeli áýletke aınalǵan. Ánjir áje olardan 67 nemere, 55 shóbere súıip otyr. Urpaqtary tatý-tátti, el qatarly tirshilik keship jatqan Ánjir Qojamberdıeva 11 sáýirde 83 jasqa tolady.
Shańyraqtyń ıesi marqum Anarbaı Qojamberdıev 2005 jyly qaıtys bolǵan. Altyn qursaqty ananyń úlken uly Juman 62 jasta bolsa, úıdiń kenjesi Perızat 38 jasta. Búginde Ánjir áje kenje uly Erlan men kelini Sársenkúldiń qolynda, bes nemereniń qylyǵy men erkeligin qyzyqtap, tálim-tárbıesine óz úlesin qosýda. Jýyrda «Aýyl» partııasynyń ókilderi kóp balaly ananyń shańyraǵynda qonaqta boldy.
«Aýyl» halyqtyq-demokratııalyq patrıottyq partııasynyń tóraǵasy Álı Bektaevtyń quttyqtaýyn jetkizgen Túrkistan oblystyq fılıalynyń tóraǵasy Nurjan Ájimetov Ánjir ájege oramal jaýyp, bir qushaq raýshan gúli men arnaıy syılyǵyn tabys etti. «Biz jastarǵa altyn qursaqty, dúnıege kóp bala ákelgen asyl analarymyzdy kóbirek nasıhattaýymyz kerek. Meniń ómirden bir túıgenim, osyndaı kóp balaly otbasydan shyqqan balalar baýyrmal, bir-birine janashyr, meıirimdi bolyp keledi. Qazir jastar bir-eki balamen shektelgendi jón kóredi, menińshe ondaı balalar ózimshil bolyp ósedi. Sondyqtan bir-eki balamen toqtamaı, kóp balaly bolǵan jaqsy dep oılaımyn», deıdi Nurjan Ájimetov.
О́zin arnaıy izdep kelip, qurmet kórsetken partııa ókilderine alǵysyn bildirgen qarııa qýanyshtan kózine jas aldy. «Denderiń saý bolsyn, meniń jasyma jetińder! О́mir boıy osy aýylda eńbek etip, zeınetke shyqtym. Qoı da baqtyq, marqum shalymyz ekeýmiz temir jolda da jumys istedik. Balalarym, urpaǵym aman bolsyn, osylardyń arqasynda aman-esen nemere-shóberelerimniń qyzyǵyn kórip otyrmyn. Senderge de juǵysty bolsyn, elimiz aman, aspanymyz ashyq bolsyn!», dep Ánjir áje qonaqtarǵa aq batasyn berdi.
Túrkistan oblysy