Búgingi senbilik saýda alańyna shyǵarylǵan azyq-túliktiń baǵasy naryqtaǵydan edáýir tómen. Eń bastysy, munda tutynýshy ónimdi eshbir deldalsyz, tikeleı taýar óndirýshiniń qolynan satyp alady.
Mysaly, qazir kartop pen sábizdiń kók bazardaǵy quny 100 teńgege jeteqabyl bolsa, arzandatylǵan jármeńkedegi baǵasy – 70-75 teńge. Fedorov aýdany shyǵaratyn bes lıtrlik tazartylmaǵan tabıǵı suıyq maı - 1 650, jergilikti «Jas qanattyń» jumyrtqasy - 23 teńge. Shalǵaı aýdandardan jetkizilgen et baǵasy da ájeptáýir arzan.
Jármeńkede oblystyń turaqtandyrý qorynan bólingen arzan azyq-túlik avtosóreleriniń aldynda uzyn-sonar kezek kútkender kóp boldy. Taýar arzan bolǵandyqtan, saýda kólikteriniń kóbi aınalasy bir-bir jarym saǵattyń ishinde bosap qalyp jatty.
Qapshyqtap qant, sómkelep et, setkilep sábiz tasyǵan yǵy-jyǵy halyqtyń ortasyna oblys ákimi arnaıy kelip, saýda qatarlaryn aralap, satýshylarmen, turǵyndarmen tildesip kórdi.
– Naýryz merekesi qarsańynda biz osymen 66-shy ret jármeńke uıymdastyryp otyrmyz. 120 tonnadaı azyq-túlik ákeldik. Onyń 45 tonnasy turaqtandyrý qorynan bólinip otyr. Qazir biz baǵany jiti baqylaýda ustap otyrmyz. Barlyq iri saýda ortalyqtarynda, kóterme saýda qoımalarynda azyq-túlik jetkilikti. Oblysta qazir bir jarym-eki aıǵa jetetin azyq-túlik bar. Un men makaron bir jylǵa deıin jetedi. Biz oblystaǵy 70 dıirmenge monıtorıng jasap, kelissózder júrgizip, olarǵa qosymsha shıkizat qoryn qamdaý týraly tapsyrma berdik. Qazir dıirmender kórshiles óńirler men Reseıdiń shekaralas aımaqtarynan qosymsha bıdaı satyp ala bastady. Eń bastysy, oblys turǵyndaryn áleýmettik mańyzy bar un, makaron, et, suıyq maı, kókónis sııaqty 19 túrli azyq-túlikpen jetkilikti túrde qamtamasyz etip otyrmyz. Oblystyń turaqtandyrý qorynda shamamen 1 mlrd 300 myń teńge qarjy tur. Sondyqtan turǵyndardy azyq-túlikpen uzaq merzimge erkin qamtamasyz ete alamyz, - dedi Arhımed Muhambetov.
Qostanaı