Jambyl oblysynyń ákimi Berdibek Saparbaev jedel áreket etý shtabynyń kezekti otyrysyn ótkizdi. Kún tártibinde koronavırýstyq ınfeksııanyń taralýyna jol bermeý jáne óńirdiń azyq-túlik qaýipsizdigin qamtamasyz etý boıynsha aldyn alý jumystaryn júrgizý máseleleri qaraldy.
«Memleket basshysy el aýmaǵynda koronavırýsty taratýǵa jol bermeý jóninde naqty tapsyrmalar berdi. Atap aıtqanda, buqaralyq, mádenı jáne sporttyq is-sharalar, konferensııalar men kórmeler ótkizýge ýaqytsha tyıym salynady. Saýda ortalyqtaryn, bazarlardy, qoǵamdyq tamaqtaný nysandaryn, vokzaldar men áýejaılardy qosa alǵanda, adamdar kóp jınalatyn barlyq jerlerde sanıtarlyq rejım kúsheıtildi. Bizdiń mindetimiz – Prezıdent tapsyrmalarynyń oryndalýyn qamtamasyz etý, halyq arasynda dúrligýge jol bermeý», dedi Berdibek Saparbaev.
Basqosýda oblystyq taýarlar men qyzmetterdiń sapasy men qaýipsizdigin baqylaý departamentiniń basshysy Berik Jarqynbekov júrgizilgen aldyn alý jumystary týraly baıandady. Alaıda, oblys ákimi aqparattyq-túsindirý jumystarynyń álsizdigin atap ótti. «Siz jergilikti jerlerde, halyq arasynda túsindirý jumystaryn júrgizýińiz kerek. Telearnalarda jáne adamdar kóp jınalatyn jerlerde beınerolıkter kórsetilip, baspasóz betinde tıisti materıaldardy jarııalaý kerek. Medısınalyq maskalardyń tapshylyǵyna shaǵymdar bar. Oblystyń bul baǵytta óz zaýyty bolǵanymen, óńirdi qarapaıym medısınalyq buıymdarmen qamtamasyz ete almaýda. Departament tarapynan baqylaý jumystary nashar júrgizilýde», dedi Berdibek Saparbaev.
Jambyl oblysy