Mádenıet, sport qaıratkerleri jáne ıntellıgensııa ókilderi Prezıdent Qasym-Jomart Toqaevtyń úndeýin qoldap, turǵyndardy koronavırýs ınfeksııasynyń aldyn alý úshin qaýipsizdik erejelerin ustanýǵa shaqyrdy. Bul týraly qala ákimdiginiń baspasóz qyzmeti habarlady.
Olardyń aıtýynsha, koronavırýs ınfeksııasynyń taralýyna jol bermeý maqsatynda memlekettik organdar tarapynan aýqymdy sharalar qabyldanýda jáne bul qıyndyqty birlese otyryp eńseretin bolamyz.
«Qazaqta sóz bar, saqtansań, saqtaımyn degen. Bul indetke qarsy el, memleket bolyp qorǵanýymyz kerek. Mundaı kezde sasqalaqtap, ushqalaqtyqqa urynyp, indetti kúsheıtip almaýymyz kerek. Barynsha tártipke baǵynyp, dárigerlerdiń aıtqan nusqaýlyǵyn oryndaıyq. Bul qıyndyqty da birige otyryp eńseremiz», - dedi aqyn Nesipbek Aıtuly.
«Barys» hokkeı komandasynyń shabýylshysy Roman Starchenko óz jankúıerlerine osynaý qıyn kezde bir-birine qoldaý kórsetýge shaqyrdy.
«Bul koronavırýs pandemııasyna oraı qabyldanǵan ýaqytsha shara. Biz qashanda Sizderdiń qoldaýlaryńyzdy sezemiz. Biz jaqsy oıyn kórsetip, sizderdi qýantqymyz keledi. Osy kezeńde bizdi, bir-birlerińizdi qoldańyzdar», - deıdi hokkeıst R. Starchenko.
Qazaqstannyń eńbek sińirgen sport sheberi, Olımpıada oıyndarynyń júldegeri Gıýzel Manıýrova memleket tarapynan qabyldanǵan sharalardy qoldaýǵa shaqyrdy. Onyń aıtýynsha barlyq sporttyq sharalar toqtatyldy. Alaıda, buǵan qaramastan bizdiń sportshylar saıystarda jaqsy nátıjeler kórsetý úshin jattyǵyp jatyr.
«Qurmetti dostar, qazir koronavırýs álemniń kóptegen elinde taralýda. Men bizdiń elimizde bul indetti jeńetinine senemin. Jeke tazalyqty saqtańyzdar. Qıyndyqty tek birlese otyryp ǵana eńseremiz», - dep atap ótti G. Manıýrova.