Premer-Mınıstr Asqar Mamınniń tóraǵalyǵymen ótken Úkimettiń selektorlyq otyrysynda kóktemgi egis jumystaryn júrgizýge daıyndyq barysy qaraldy. Bul týraly Premer-Mınıstrdiń baspasóz qyzmeti habarlady.
Sharýalardyń egis naýqanyna daıyndyǵy týraly aýyl sharýashylyǵy mınıstri S. Omarov, janar-jaǵarmaı materıaldarymen qamtamasyz etý týraly energetıka mınıstri N. Noǵaev, óńirlerdegi jaǵdaı týraly Túrkistan oblysynyń ákimi О́. Shókeev, Almaty oblysynyń ákimi A. Batalov, Qostanaı oblysynyń ákimi A. Muhambetov baıandady.
Bıyl 22,5 mln ga jerdi ıgerý josparlanyp otyr, bul 2019 jylǵy deńgeıden 238 myń ga artyq. Dándi daqyldar shamamen 15,2 mln ga (onyń ishinde bıdaı – 11,4 mln ga), maıly daqyldar 3 mln ga (+122 myń ga), maqta 110 myń ga, qant qyzylshasy 22 myń ga, kókónis-baqsha daqyldary jáne kartop 471,7 myń ga, jemshóp daqyldary 3,7 mln ga jerge egiledi dep kózdelgen.
Kóktemgi egis jumystaryn júrgizý úshin qajetti dızel otynynyń kólemi anyqtaldy – 387 myń tonna (aýyl sharýashylyǵy taýaryn óndirýshiler úshin ortasha baǵa – shamamen 177 teńge/lıtr). Respýblıkada 143 myń traktor, 78 myń tuqym sepkish, 243 myń topyraq óńdeý quraldary, 4 myń egis keshenderi bar. 2020 jylǵy 15 naýryzdaǵy jaǵdaı boıynsha traktorlardyń ázirligi 94%-dy, tuqym sepkishter 93%-dy, egis keshenderi 100%-dy, topyraq óńdeý quraldarynyń daıyndyǵy 95%-dy quraıdy.
Agroónerkásiptik keshen sýbektilerin qoldaý úshin «Agrarlyq nesıe korporasııasy» AQ respýblıkalyq bıýdjetten 70 mlrd teńge kóleminde bıýdjettik nesıe bóldi, bul ádettegi tájirıbeden 10 mlrd-qa artyq. Sońǵy qaryz alýshylar úshin syıaqy mólsherlemesi jyldyq 5%-dan aspaıdy. Bólingen qarajat 3 mln ga egis alqabyn qamtýmen AО́K 2400 sýbektisin qarjylandyrýǵa múmkindik beredi.
«Jalpy kóktemgi egis jumystaryna daıyndyq ýaqytyly júrgizilip jatyr. Úkimet tarapynan kóktemgi egistikti qarjylyq jáne materıaldyq-tehnıkalyq qamtamasyz etý boıynsha barlyq qajetti sheshimder qabyldandy», — dedi A. Mamın.
Úkimet basshysy keıbir óńirlerdiń tuqym daıyndaý (ShQO, BQO, Qyzylorda, Pavlodar, Aqtóbe oblystary), aýyl sharýashylyǵy tehnıkasyn daıyndaý josparlarynan (BQO, Aqmola, Almaty, Qyzylorda oblystary) artta qalyp jatqanyn, sondaı-aq barlyq derlik oblystarda (Jambyl jáne Túrkistan oblystarynan basqa) tyńaıtqyshtar boıynsha sýbsıdııalardyń bekitilgen normalarynyń joqtyǵyn atap ótti.
«Aýyl sharýashylyǵy mınıstrligi men oblys ákimderi kóktemgi egis jumystaryn sapaly júrgizý boıynsha barlyq qajetti sharalardy ýaqytyly qabyldasyn. Energetıka mınıstrligi bekitilgen keste men baǵaǵa sáıkes qajetti dızel otynyn jetkizýdi qamtamasyz etsin», — dep tapsyrma berdi A. Mamın.
Premer-Mınıstr «QazAgro» UBH» AQ-ǵa qarjy qarajatyn tıimdi paıdalanýdy jáne olardyń aýyl halqy úshin qoljetimdiligin qamtamasyz etýdi tapsyrdy.