Bıyl 5 aqpanda Ishki ister mınıstri, polısııa general-leıtenanty Erlan Turǵymbaevtyń bastamasymen Uly Jeńistiń 75 jyldyǵyna oraı «Biz – Jeńistiń muragerimiz» atty estafeta bastalǵan bolatyn.
Taıaýda Kókshetaý qalasyndaǵy 5510 áskerı bólimde jaqsy úrdis jalǵasyn taýyp, áskerı bólimniń saptyq alańynda taǵylymdy is-shara bolyp ótti. Jıynǵa kúshtik qurylymnyń basshylary jáne II Dúnıejúzilik soǵysynyń ardagerleri, tyń eńbekkerleri men sarbazdar qatysty.
Is-shara barysynda Keńes Odaǵynyń Batyry, general-maıor I.V.Panfılov basqarǵan dıvızııanyń Jaýyngerlik Týynyń kóshirmesin Qostanaı qalasyndaǵy 6697 áskerı bólimi komandıriniń tárbıe jáne áleýmettik-quqyqtyq jumystar jónindegi orynbasary, podpolkovnık Baýyrjan Shoraev Kókshetaý qalasyndaǵy 5510 áskerı bóliminiń komandıri, podpolkovnık Asqar Faızýlınge saltanatty jaǵdaıda tabys etti.
Sóıtip, Qostanaıdan Kókshetaýǵa jetken bul estafetanyń basty maqsaty - Otan úshin janyn pıda etken jaýyngerlerdiń erligine qurmet kórsetý, esimderin el esinde saqtaý, jastardyń boıynda otansúıgishtik, eljandylyq, batyrlyq sııaqty abzal qasıetterdi qalyptastyrý. Jıynda II Dúnıejúzilik soǵysynyń ardageri Álimgereı Majenov sóz sóıledi.
– Surapyl soǵys jyldary eli úshin janyn pıda etken qansha erjúrek jaýynger qan maıdan dalasynan oralmady. Olar keleshek urpaqqa beıbit ómirdi amanat etti. Búgingi urpaq osy ómirdiń qadirin bilýi kerek. Soǵys órti órship turǵan jyldary eńkeıgen qarttan eńbektegen balaǵa deıin ala tańnan eńbek dalasynan tabylyp, qara jumysqa jegildi. Olardyń da osy Jeńiske qosqan úlesi ólsheýsiz. Munyń barlyǵy urpaq sanasynan eshqashan óshpeýi tıis, – dedi ardager óz sózinde.
Taqyryptyq kesh sońy konserttik baǵdarlamaǵa ulasty.
Aqmola oblysy