Almaty qalasy ákimdiginiń baspasóz ortalyǵynda Jasyl ekonomıka basqarmasy basshysynyń orynbasary Dıas Ahmetqalıevtyń qatysýymen joldardy jýý men aıaldama keshenderin óńdeýge baılanysty onlaın-baspasóz konferensııasy aıaqtaldy.
Dıas Ahmetqalıevtyń aıtýynsha, balalarǵa arnalǵan oıyn, sport alańdaryna jáne basqa da adamdar kóp shoǵyrlanǵan jerlerge dezınfeksııa jumystary júrgiziledi. Sonymen birge qoqys shyǵaratyn uıymdar da kúndelikti kestege sáıkes qatty turmystyq qaldyqtardy shyǵarady. Qaladaǵy konteınerlik alań men konteınerlerge dezınfeksııa jumystary kúsheıtilgen túrde júrgiziledi.
- Qurmetti qala turǵyndary, sizderdiń qaýipsizdikterińiz úshin barlyq paıdalanǵan medısınalyq qaldyqtardy ári qaraı zalalsyzdandyrý maqsatynda bólek paketterge jınap, shyǵarýlaryńyzdy suraımyz, – dedi D.Ahmetqalıev.
Bul rette barlyq qyzmetkerler maska, kózildirik, arnaıy qolǵaptarmen qamtamasyz etilgen. Qaladaǵy barlyq avtobýs antıseptıktermen jabdyqtalǵan. Joldar men trotýarlar kúnine eki ret, tańerteń jáne keshke jýylady.