Selınograd aýdanynyń ákimi bolyp Baqytbek Ospanbekov taǵaıyndaldy. Buǵan deıin bul mindetti atqarǵan Málǵajdar Tátkeev taıaýda oblys ákiminiń orynbasary bolyp taǵaıyndalǵan bolatyn. Oblys ákimi Ermek Marjyqpaev jańa taǵaıyndalǵan ákimniń qyzmetine tabys tilep, birqatar máselelerdi shuǵyl qolǵa alýdy tapsyrdy.
–Prezıdent ákimshiliginiń kelisimimen Selınograd aýdanynyń ákimi bolyp Baqytbek Amantaıuly Ospanbekov taǵaıyndalady. Baqytbek Amantaıuly 1968 jyly dúnıege kelgen. Aqmola oblysynyń týmasy. Selınograd ınjenerlik-qurylys ınstıtýtynda bilim alǵan,–dedi oblys ákimi.
Baqytbek Ospanbekov 2018 jyldyń sáýir aıynan beri oblystyq memlekettik sáýlet-qurylys baqylaý basqarmasynyń jetekshisi qyzmetin atqarǵan. Turǵyn úı-kommýnaldyq sharýashylyǵy jáne qurylys salalaryndaǵy tájirıbesi mol. Osy aýdanda ákimniń orynbasary qyzmetin atqarǵan.
Ermek Marjyqpaev buǵan deıin 6 jyl Selınograd aýdanynyń ákimi qyzmetin abyroımen atqarǵan Málǵajdar Tátkeevke alǵys bildirdi. Osy jyldar ishinde Málǵajdar Sattaruly óńirdiń órkendeýine eleýli úles qosyp, eldi mekenderdiń ınfraqurlymyn jańǵyrtýǵa kóp kúsh jumsady. Taǵaıyndaýdan keıin, oblys ákimi Ermek Boranbaıuly aýdandaǵy kóktemgi sý basý qaýpine qarsy áreket etýdiń barysyn baǵamdady. Talapker jáne Nuresil aýyldarynyń arasyn jalǵaǵan kópirdiń búgingi jaı-kúıimen tanysty.
12 naýryzda Talapker aýylynyń tusynan ótetin Esil ózeniniń 1 shaqyrym arnasyn túzetý jáne tereńdetý sharalary júrgizilgen edi. Jaǵalaýdy bekitý jumystary da aıaqtalǵan. Oblys ákimi Ermek Marjyqpaev sý basý qaýpine qarsy sharalardy táýlik boıy baqylaýdy tapsyrdy.
Selınograd aýdany,
Aqmola oblysy.