О́kinishke qaraı, búgingideı jaýapty sátte tótenshe jaǵdaı talaptaryn saqtaýǵa mán bermeı otyrǵan toıshyl qaýym tabylýda. Túrkistan oblysy Tólebı aýdanynyń turǵyny Lengirde ornalasqan kafesiniń jumysyn tún jarymyna deıin toqtatpaǵan.
Quqyq buzǵan dámhana qojaıynyna qatysty tótenshe jaǵdaı rejımin buzǵany úshin Qazaqstan Respýblıkasy ÁQBtK-niń 476-babymen hattama resimdelgen. Aýdandyq sotta óz isine ókinetindigin aıtyp, kinásin tolyq moıyndaǵan kásipkerge 26510 teńge aıyppul salyndy. Sondaı-aq tótenshe jaǵdaı rejımin buzǵany úshin Arys qalasynyń turǵynyna 18557 teńge kóleminde aıyppul salyndy. Arys qalasynyń turǵyny óz úıiniń aýlasyna týǵan-týystaryn shaqyryp, kópshilikti jıyp betashar toıyn ótkizgen. Sotta quqyq buzýshy áıel perzentiniń qýanyshyn jaqyndarymen bóliskisi kelgenin, tártipke baǵynbaı quqyq buzǵanyna ókinetindigin, óziniń kinásin tolyq moıyndaıtynyn aıtqan.
Aıta ketelik, eki jaǵdaıǵa baılanysty da sot qaýlysy zańdy kúshine enbegen.