Búgin Almatydaǵy 23 naýryz, saǵat 16.00 kezindegi epıdemıologııalyq jaǵdaı tómendegideı bolyp tur.
Búgin Almaty qalasynda koronavırýs juqtyrǵan taǵy bir adam anyqtaldy. 1975 jyly týǵan áıel qalaǵa Egıpetten osy jyldyń 23 naýryzynda túngi saǵat 01.00-de ushyp kelgen.
Ushyp kelgen boıda karantınge jatqyzylyp, oǵan COVID-19 synamasyna taldaý jasalǵan. Búgin dıagnoz naqtylandy.
Sondaı-aq birqatar BAQ jarııalaǵan eki adam karantınde jatyp juqtyrǵan degen aqparattyń jalǵan ekeni habarlandy.
Olardyń bireýi Máskeý–Almaty reısimen kelgen buryn vırýs juqtyrǵan naýqaspen tyǵyz baılanysta bolǵan. Osyǵan baılanysty naýqas 14 kúndik karantınge oqshaýlandy. Keshe onyń vırýs juqtyrǵany ókinishke oraı, oń nátıje berip, anyqtaldy.
Ekinshi adam Mınsk–Almaty reısi arqyly ushyp kelgen. Ol otyrǵan áýelaınerinde buryn indet juqtyrǵan, Parıjden osy reıs arqyly ushyp kelgen jolaýshy bolǵan. Sol kúni ushaqtyń barlyq jolaýshysy karantınge oqshaýlandy. Keshe onyń da boıynan aýrý belgileri anyqtaldy.
Osylaısha, bul naýqastar dertine áýe saıahaty kezinde buryn osy ınfeksııany juqtyrǵandarmen baılanysý arqyly dýshar bolyp otyr.
Qazirgi ýaqytta 26 naýqas qalalyq klınıkalyq juqpaly aýrýlar aýrýhanalarynda em alyp jatyr.
Buǵan deıin habarlanǵandaı, eki naýqastyń jaǵdaıy qazir ortasha aýyr, al qalǵandarynyń jaǵdaıy – qanaǵattanarlyq.
Búginde qalanyń provızorlyq gospıtaldarynda 660 azamat, karantızasııaǵa arnalǵan nysandarda qosymsha 778 adam bolsa, úı karantıninde 1472 adam bar.
Karantınge oqshaýlanǵan barlyq azamattyń dene qyzýy birqalypty, kataraldy qubylystar joq.
Provızorlyq gospıtaldarda aýyrǵan naýqastarmen baılanysta bolǵan jáne 1A sanatyndaǵy elderden kelgen adamdar bar ekenin ESKERTILEDI. Olar ashanany birge paıdalanbaıdy jáne jeke kútimi oqshaýlanǵan.