Buǵan deıin habarlanǵandaı, Almatyda medısınalyq betperdeler men antıseptıkalyq quraldardyń alaıaqtyq jolmen saýdaǵa túsýin, sondaı-aq negizsiz qymbatqa satý faktilerin anyqtaý úshin reıdtik is-sharalar júrgizilip jatyr. Nátıjesinde Almatyda kásipkerlik qyzmetti júzege asyrýy úshin tıisti qujaty joq azamattar betperdelerdi ústeme baǵamen satý barsynyda qolǵa tústi.
Prezıdent janyndaǵy Tótenshe jaǵdaı rejımin qamtamasyz etý jónindegi memlekettik komıssııanyń hattamasy negizinde tárkilengen medısınalyq betperdeler dereý qalalyq Qoǵamdyq densaýlyq basqarmasyna berildi.
Tárkilengen 3 mln betperde sanıtarlyq-epıdemıologııalyq sharalardy kúsheıtilgen rejımde júzege asyryp jatqan qaladaǵy barlyq medısınalyq uıymdarǵa bólinip beriledi.
2 mıllıonnan astam medısınalyq betperdeler qalalyq Qoǵamdyq densaýlyq basqarmasynyń medısınalyq qyzmetkerlerine berildi. Búginde olar provızorlyq stasıonarlar men ızolıatorlarda,sondaı-aq úı stasıonaryndaǵy adamdarǵa medısınalyq baqylaý júrgizýde.
Qalǵan jeke qorǵaný quraldary epıdemıologtarǵa, Taýarlar men qyzmetterdiń sapasy men qaýipsizdigin baqylaý, Ishki ister, TJ, Ulttyq gvardııa jáne t.b. departamentterdiń qyzmetkerlerine úlestirildi.
Sonymen qatar, betperdeler Open Almaty qoǵamdyq qabyldaý bólmesiniń qyzmetkerlerine de taratyldy. О́ıtkeni olar táýlik boıy 1308 nómiri boıynsha turǵyndarǵa barlyq máseleler jóninde, sonyń ishinde koronavırýstyq ınfeksııanyń taralýyna qarsy áreket boıynsha keńes berýde.
Reıdtik is-sharalar kezinde 16 tonna spırt te tárkilendi. Sterıldeý kezinde dezınfeksııalaý quraly retinde paıdalanýǵa jaramdy bul spırt medısınalyq uıymdarǵa bólindi.