Pandemııaǵa ulasqan COVID-19 indetinen aldyn ala saqtaný úshin S.Báıishev atyndaǵy Aqtóbe oblystyq ámbebap kitaphanasy elimizde tótenshe jaǵdaı jarııalanǵan kúnnen bastap óz oqyrmandaryn qabyldaýdy toqtatqan edi. Áıtse de bul jaǵdaı kópshiliktiń kitap oqýǵa degen suranystary men qyzyǵýshylyǵyn tejeı almady. Tipti keıingi kezderi aqtóbelikterdiń kitap oqýǵa degen yntasy arta túskeni belgili bolyp otyr. Bul jóninde gazet tilshisine kitaphana meńgerýshisi Baqtyly Qoshabaeva aıtyp berdi.
Qazirgi koronavırýs indeti kezinde adamdardyń rýhanı suranysy men qajettiligin qanaǵattandyra alatyn qazynaly mekemeniń aqparattyq tehnologııalardyń kómegimen kópshilikke qyzmet jasaýdy jalǵastyryp júrgeni atap aıtýǵa turarlyqtaı is ekeni anyq. Bul jóninde oblystyq kitaphanaǵa arnaıy kelip onyń qyzmetimen tanysqan Aqtóbe oblysynyń ákimi Ońdasyn Orazalın óz oı-pikirin tómendegishe tujyrymdady.
«Azamattar qandaı kúrdeli kezeńde de, qandaı synı shaqta da ózderine rýhanı nár men azyq ala bilýleri kerek. Tótenshe rejim jaǵdaıynda da kitaphanada oqyrmandar suranystaryn qanaǵattandyrýdyń tyń tásilderi izdestirilip jatqany izetti de saýaby mol is. Bul rette elektrondy kitaptar sanyn kóterýge neǵurlym kóbirek kóńil bólinse, qolǵa alynǵan istiń nátıjesi de soǵurlym joǵary bolmaq. Qazirgi kúni osyndaı qajettilik týyp otyrǵandyqtan kitaphana ujymy oqyrmanǵa qajetti kez kelgen oqýlyq pen kitaptyń qoljetimdi bolýyna qam-qareket jasaı bilgenderi jón. Bul baǵyttaǵy bastamalar kóńilden shyǵady».
Buǵan qosa aıtarymyz, qazirgi kezde aqtóbelik oqyrmandar Baishev.kz saıty arqyly kez kelgen suraqtarǵa jaýap ala alady. Kitaphanada «О́lketaný» baǵyty boıynsha 2015 jyldan beri 1500 kitap elektrondy formatqa kóshirilgen. Sonymen qatar kvorkıng ortalyǵynda «Aqtóbedegi Amerıka» buryshy qyzmet kórsetedi. Munda asa qundy ári kez kelgen jerde tabyla bermeıtin úsh myńnan astam aǵylshyn tilindegi kitaptar qoıylǵan. Kitaphanaǵa budan eki jyl buryn quny 4,5 mıllıon teńge turatyn kólemi úlken ElarSkan skaneri satyp alynǵan. Sonyń arqasynda aıyna elý-alpys kitapty sıfrlandyrýǵa múmkindik týyp otyr.
AQTО́BE