Petropavl qalasynda ózin eriktimin dep tanystyryp, zeınetkerlerdi aldaǵan alaıaq ustaldy. Zardap shegýshi keıýananyń aıtýyna qaraǵanda, alaıaq áıel Naýryz meıramyn toılaýǵa oraı oǵan ákimdiktiń atynan bir myń teńge tartý beriletinin jáne erteń azyq-túlik paketiniń jetkiziletinin aıtyp senimine kirgen. Sosyn keıýanaǵa qaltasynan bes myń teńge berip, artyǵy – tórt myń teńgeni qaıtaryp berýdi ótingen. Aqsha beriletinine jáne azyq-túlik paketin alatynyna qýanǵan keıýana alaıaqqa tórt myń teńgeni qolma-qol qaıtaryp beredi. Sóıtse... ol sývenır retinde jasalǵan aqshanyń kóshirmesi eken.
Keıýananyń senimine ábden kirip, asyqpaı áńgimege tartqan alaıaq jalǵan eki myń teńgesin de aıyrtyp alady. Aldanǵanyn artynan bilgen 76 jastaǵy keıýana polısııaǵa shaǵym jasaǵan. Dál osyndaı oqıǵany basqa qartań áıel de basynan keshken eken. Ol da polısııaǵa shaǵynyp úlgeredi.
Alaıaqtyń izine jedel túsken polısııa qyzmetkerleri ony bir táýliktiń ishinde ustady. 39 jastaǵy alaıaq áıel buǵan deıin de osyndaı qylmys jasap, túrmeniń dámin tatyp shyqqan adam bolyp shyqty.
Qazir onyń ústinen alaıaqtyq jáne usaq urlyq faktileri boıynsha Qylmystyq kodekstiń 190 jáne 187-baptary boıynsha sotqa deıingi tergeý júrgizilýde. Ustalǵanǵa qatysty "mindetti kelý" bultartpaý sharasy belgilendi. Osyǵan baılanysty málimdeme jasaǵan SQO Polısııa departamenti krımınaldyq polısııa basqarmasynyń bastyǵy, polısııa polkovnıgi Petr Klımov:"Barlyq azamattardy saq bolýǵa jáne egde jastaǵy týǵan-týystaryńyzdy alaıaqtardyń áreketi týraly eskertýge shaqyramyz. Alaıaqtar sengish azamattardy quryǵyna túsirý úshin koronavırýstyń taralýyna qatysty týyndaǵan jaǵdaıdy da paıdalana otyryp, túrli oqıǵalardy oıdan shyǵaryp, aılalaryn júzege asyrýǵa beıim", - dedi ol.
PETROPAVL