Bul týraly Mańǵystaý oblysynyń Tabıǵı resýrstar jáne tabıǵat paıdalanýdy retteý basqarmasynyń baspasóz qyzmeti habarlady.
Mańǵystaý oblysynda jergilikti bıýdjetten qarjylandyrylatyn ormandar jáne janýarlar dúnıesin qorǵaý jónindegi «Sam» jáne «Beıneý» atty eki memlekettik mekeme bar.
«Sam» orman mekemesi Beıneý aýdanynyń, al «Beıneý» orman mekemesi Beıneý men Mańǵystaý aýdandarynyń aýmaǵynda ornalasqan. Orman qorynyń negizi – qara sekseýil ósindileri. Jylyna 300 gektar jerge qara sekseýil tuqymdary egiledi.
Sońǵy úsh jylda 300 gektar egilgen jerden 2017 jyly 148 gektar, 2018 jyly 52 gektar, 2019 jyly 280 gektar orman jamylǵysy orman qory jerine qosyldy. Eki mekeme de Ústirt qyratynyń ústinde: Sam ormany - Beıneý aýdanynyń soltústik-shyǵys bóliginde Aral teńizine jaqyn, al Beıneý ormany - Beıneý aýdanynyń ońtústik bóligi men Mańǵystaý aýdanynyń soltústik bóligindegi, jylyna 120-170 mm atmosferalyq ylǵal túsetin, shóldi alqapta ornalasqan.
Árbir sekseýil jylyna atmosferaǵa 500 keli taza ottegin shyǵaratynyn eskersek, sekseýil orman alqaptarynyń óńirde qolaıly klımat jasaýǵa jáne ekologııalyq jaǵdaıdy jaqsartýǵa erekshe úlesi bar. Atalmysh eki mekeme jyl saıyn «Aǵash kesý jáne orman bıletin berý» memlekettik qyzmetin kórsetedi. 2019 jyly 43 orman bıleti jeke sharýa qojalyqtaryna orman qorynda jaıylymdylyq jerden mal jaıýǵa berildi.
Ormandar jáne janýarlar dúnıesin qorǵaý jónindegi «Beıneý» jáne «Sam» mekemeleriniń ókilderi polıseılermen birlese otyryp ótken jyly 100 reıd, onyń ishinde birlesken 7 reıdtik sharalarǵa qatysqan.
2019 jyly orman sharýashylyǵyn damytý baǵytynda Mańǵystaý oblysy ákimdiginiń ormandaryn molyqtyrý jáne orman ósirý kólemin ulǵaıtýdyń 2019-2030 jyldarǵa arnalǵan qadamdyq jospary Aýyl sharýashylyǵy mınıstrligimen kelisilip, oblys ákimimen bekitilgen. О́rt qaýpi maýsymyna deıin orman alqabyna jaqyn ornalasqan sharýa qojalyqtaryna órt qaýipsizdigi jaıly túsindirý jumystary júrgizildi.
Mańǵystaý oblysy