Atyraýda «SheberFEST-2026» halyqaralyq qolónershiler festıvali bastaldy. Sultan Beıbarys alańy naǵyz sheberler qalasyna aınaldy: munda jartylaı sýrt formatyndaǵy taqyryptyq aımaqtar ornatyldy. Munda árkim halyq shyǵarmashylyǵymen jaqynyraq tanysa alady, dep habarlaıdy Egemen.kz
Aýqymdy festıvalge Qazaqstan, Reseı, Qyrǵyzstan jáne О́zbekstannan 100-ge jýyq sándik-qoldanbaly óner sheberleri qatysty.
Olar kıizden jáne zergerlik buıymdardan bastap aǵash oıýlaryna, ulttyq mýzykalyq aspaptarǵa, toqýǵa jáne etno dızaınǵa deıin 4000-ǵa jýyq avtorlyq buıymdardy usyndy.
Festıvalge qatysqan oblys ákimi Serik Shapkenov ekspozısııamen tanysyp, halyq qolónerin saqtaý men nasıhattaýdyń mańyzdylyǵyn atap ótti.
«Halyq qolóneri – bul ulttyń jany men biregeıligi. Onda qazirgi zamanǵy sheberler saqtaǵan ata-babalardyń eńbegi, talanty men rýhanı murasy beınelengen. Atyraý oblysy tarıhy baı, dástúri men biregeı mádenıeti bar óńir. «SheberFEST» festıvali – halyq sheberlerin qoldaý jáne jastar arasynda ulttyq ónerdi dáripteý úshin mańyzdy shara, - dedi S.Shapkenov.
Ulttyq mereke atmosferasyn etnodefıle, dástúrli taǵamdar kórmesi jáne qazaqtyń ulttyq oıyndary tolyqtyrdy. Festıval jergilikti ártisterdiń qatysýymen ótetin konserttik baǵdarlamamen jalǵasady. Al keshtiń basty keıipkeri Qazaqstandyq ánshi BAYANSULU boldy.
Aıta keteıik, festıval 23 mamyrǵa deıin jalǵasady. Kelýshilerge sheberlik sabaqtar, konserttik baǵdarlamalar jáne qazaq halqynyń baı mádenı murasymen tanystyrylady. Sheteldik jáne qazaqstandyq sheberler tigý, ulttyq keramıka, balshyqpen jumys jáne «bizkeste» kesteleý óneriniń qupııalarymen bólisetin bolady. Qatysýshylar qolónershilerdiń jumysyn baqylap qana qoımaı, óz qoldarymen buıymdar jasaýǵa tyrysady.