700-ge jýyq polısııa qyzmetkeri karantın kezeńinde Almaty qalasynyń jataqhanalaryna ornalastyryldy. Bul týraly tıisti vedomstvonyń resmı saıtynda habarlandy.
Karantındik rejımge baılanysty vırýs taralmas úshin qaladan tys jerde turatyn Polısııa departamentiniń qyzmetkerleri ýaqytsha jataqhanalarǵa jaıǵasady.
«Bizdiń qalamyz karantın rejıminde bolǵandyqtan, kez kelgen turǵyn juqpaly aýrýdyń qozdyrǵyshy bola alady. Tótenshe jaǵdaıda quqyq qorǵaý júıesiniń jumysy kúsheıip, polısııa qyzmetkerleriniń halyqpen baılanysy – jumystyń ajyramas bóligi bolyp tabylady. Polısııa jumysynyń ereksheligine baılanysty qalanyń syrtynda turatyn tártip saqshylaryn ýaqytsha turǵyn úımen qamtamasyz etý týraly sheshim qabyldandy. Memleket esebinen bizdiń qyzmetkerlerge barlyq jaǵdaı jasaldy. Karantın kezinde Almatynyń barlyq polısııa qyzmetkerleri kazarmalyq rejımde – qalada bolady», – dedi Almaty qalalyq Polısııa departamenti basshysynyń orynbasary Abdýalı Nasharbekov.
Tártip saqshylary turatyn jataqhanalarda turmysqa qajettiniń bári bar. Polıseılerdiń pikirin tyńdap kórýge bolady.
«Úıde úsh balam, áıelim jáne anam qaldy. Árıne, biz saǵynamyz. Biraq bul – qyzmet. Týysqandar aldyndaǵy jaýapkershilik bar, ózimizge júktelgen mindetter bar, bárin túsinemiz. Turǵyn úı jaǵdaılary týraly shaǵym joq, bári bar deýge bolady. Qajet bolǵan kezde kazarmada, shatyrly lagerlerde de turamyz, eń bastysy – elimiz tynysh bolsa, azamattarymyzǵa qaýip tónbese boldy», – deıdi Metropolıtendegi Polısııa basqarmasynyń qyzmetkeri Qýat Baıshýaqov.