О́ńirlik kommýnıkasııalar qyzmetinde ótken brıfıngte Aqmola oblysy densaýlyq saqtaý basqarmasynyń basshysy Súlen Ilııasov oblysymyzda koronavırýs juqtyrǵan bir adamnyń tirkelip, kóz jumǵanyn jetkizdi.
–Júrgizilgen ıntensıvti terapııaǵa qaramastan №2 oblystyq kópbeıindi aýrýhanasynda oblysymyzdyń 64 jastaǵy turǵyny koronavırýs indetinen qaza tapty. Áıel naýryzdyń 25-i kúni tańǵy saǵat 7.00-de aýrýhanaǵa jedel járdem kóligimen óte aýyr jaǵdaıda tústi. Algorıtmge sáıkes, jedel respıratorlyq vırýstik juqpasy bar degen eskertpe jasalyp, koronavırýske kúdikti retinde esepke alyndy.Oblystyq densaýlyq saqtaý basqarmasynyń jáne óz atymnan marqumnyń týǵan-týysqandaryna qaıǵyryp kóńil aıtamyn, – dedi basqarma basshysy.
Eki ókpesiniń qabynýy, tynys alýynyń qıyndaýy, sonymen qatar qant dıabeti saldarynan týyndaǵan sepsıs, gıpertonııalyq aýrý men ateroskleroz ajalǵa sebep bolǵan. Naýqasta pnevmonııa qaterli indettiń saldarynan paıda bolǵan. Ol shetelge shyqpaǵan jáne koronavırýs juqtyrǵandarmen baılanysta bolmaǵan. Qazirgi tańda marqummen baılanysta bolǵan tulǵalar karantınge jatqyzylyp, tıisti zertteýler júrgizilýde. Brıfıng barysynda basqarma basshysy Súlen Ilııasov atalmysh jaǵdaıǵa baılanysty qajetti epıdemıologııalyq sharalar jasalyp jatqanyn aıtty.
Aqmola oblysynyń taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Serik Omarhanov elimizde koronavırýsten bir azamatshanyń kóz jumǵany týraly jedel habar túsken boıda, Selınograd aýdandyq taýarlar men kórsetiletin qyzmetterdiń sapasy men qaýipsizdigin baqylaý basqarmasy koronavırýsten kóz jumǵan naýqaspen baılanysta bolǵandardy anyqtap, oqshaýlaǵanyn aıtty. Olardyń barlyǵy medısına qyzmetkerleriniń jiti baqylaýynda. Sonymen qatar, marqumnyń turǵan úıi de zalalsyzdandyrylady.